Փաստ ինֆո

Ռուս սահմանապահները դեռևս մեկ շաբաթ առաջ այցելել են Տավուշի մարզի Այգեհովիտ, Ազատամուտ, Ոսկեպար, Բերքաբեր համայնքներ։ Տարածքներ են ընտրել՝ տեղակայվելու համար։ Ոսկեպարում սահմանապահներն այսօր արդեն ուղեկալներ ու դրոշներ են տեղադրել։ 

Այսօր առավոտյան՝ 10։00-ին, Տավուշի մարզի Ազատամուտ համայնքում եւս երկու ռուս սահմանապահ է տեղակայվել։ Այդ մասին «Փաստինֆո»-ին տեղեկացրեց համայնքի ղեկավարը՝ նշելով, որ առաջիկայում սպասվում է ավելի մեծ խմբի տեղակայում։

«Արդեն աշխատանքներ են արվում, որ գան տեղակայվեն։ Երկու ռուս սահմանապահ եկել է, իրենց հետ կան նաև 7-8 հայ զինվորականներ՝ իրենց աշխատողներն են։ Նրանց ներկայացնելով տաս օրից մոտ 50 հոգանոց խումբ պետք է գա, հիմա աշխատանքներ են իրականացնում, հիմնական ուղեկալներ սարքեն՝ իրենց տեղակայվելու համար»։

Համայնքապետը նշում է, որ սահմանապահների առաջին այցը եղել է Այգեհովիտ, որտեղ տարածք են ընտրել՝ տեղակայվելու համար։ Ժամանակավորապես տեղակայվելու վայր է անհրաժեշտ եղել ու այցելել են Ազատամուտ, մինչև իրենց շինությունները, կոմունիկացիաները պատրաստեն, որպեսզի տեղափոխվեն։

«Այգոհովիտի վարչական տարածքում են լինելու։ Նախնականով այնտեղ են մնալու՝ սահմանին մոտ»։

Դիտարկմանը՝ մտավախություն չունեն, որ տարածքների հանձնման հարցը կարող է իրականանալ, համայնքապետը նշեց, որ ոչինչ չի բացառում, քանի որ իրականում չգիտի, թե հետագայում ինչ զարգացումներ կլինեն։

«Այս պահի դրությամբ իրենք այստեղ են։ Իմ տեղեկություններով՝ իրենց նպատակը անվտանգության ապահովումն է, որպեսզի նման խնդրի չբախվենք, ինչպես Գեղարքունիքում»։

Այսօր Տավուշի մարզպետ Հայկ Ղալումյանը հանդիպել է համայնքապետերին, քննարկել նաև ռուս սահմանապահների տեղակայման հարցը։

Վստահեցնում են՝ անվտանգությունը ապահովելու, միջադեպերից խուսափելու համար։

Հարցին՝ կան արդյո՞ք խոսակցություններ սահմանազատումներ անելու մասին, համայնքապետը նշեց, որ այս պահին նման տեղեկություններ չկան։

«15 րոպե առաջ էլ այնտեղ էի, նման խոսակցություն չկա, լինելու է բանակցություններից հետո։ Որքանով տեղյակ եմ՝ փոխվարչապետը հայտնել էր, որ բանակցությունների արդյունքներով սահմանապահները պետք է ՀՀ տարածքով տեղակայվեն»։

Համայնքապետը տեղեկություն ունի, որ ՀՀ զինված ուժերը եւս տեղակայված պետք է մնան իրենց հենակետերում, իսկ ռուս սահմանապահները մոնիթորինգ են իրականացնելու նաեւ ԱԹՍ-ներով։

«ԱԹՍ-ների միջոցով հսկելու են սահմանը, որպեսզի սահմանային խախտումներ չլինեն, մինչև դիվանագիտական ճանապարհով հանգուցալուծում կլինի։ ԶՈՒ-երը կանգնելու են իրենց դիրքերում, միայն իրենց հենակետերը միմյանցից հեռու են, դրոններով են հսկելու։ Էնպես չի, որ մեր բանակը հետ է գնալու, իրենք գան։ Ադրբեջանցիների համար դա զսպաշապիկ է, որ ռուսները այստեղ են»,- ասաց համայնքի ղեկավարը։

Աղբյուր` Փաստինֆո