Փաստ ինֆո

ԲԴԽ-ն հեռացել է խորհրդակցական սենյակ՝ Երևանի ընդհանուր իրավասության դատարանի դատավոր Դավիթ Գրիգորյանին կարգապահական պատասխանատվության ենթարկելու միջնորդության վերաբերյալ որոշում կայացնելու։ «Փաստինֆո»-ի հաղորդմամբ՝ որոշումը կհրապարակվի օգոստոսի 16-ին՝ ժամը 15։00-ին։

Ինչպես արդեն տեղեկացրել ենք՝ ՀՀ արդարադատության նախարարության կողմից Երևանի ընդհանուր իրավասության դատարանի դատավոր Դավիթ Գրիգորյանի նկատմամբ կարգապահական վարույթ է հարուցվել՝ լրատվամիջոցներից մեկին տված հարցազրույցի ընթացքում, ՀՀ քրեական օրենսգրքի 300.1-րդ հոդվածի մեղադրանքով գործով վարույթը կարճելու մասին որոշման վերաբերյալ, իբրև կարծիք արտահայտելու համար։ Ըստ ԱՆ-ի՝ դատավորի կողմից թույլ են տրվել դատավարական առերևույթ խախտում, միջամտություն է եղել արդարադատության իրականացմանը, ազդեցություն է եղել դատարանների հեղինակությանը, մինչդեռ, դատավոր Գրիգորյանն անդրադարձել էր ՍԴ որոշմանը, իսկ մեղադրանքի վերաորակման վերաբերյալ հարցին ի պատասխան նշել էր, որ այդ հոդվածով մեղադրանքը գոյություն չունի, հետևաբար, մեղադրանքի վերաորակման մասին խոսելն ավելորդ է։

Վարույթի շրջանակներում դատավորի հարցազրույցի ձայնագրությունը չի հետազոտվել, այդուհանդերձ, եզրափակիչ ելույթում ՀՀ արդարադատության նախարարությունը, պնդեց, թե դատավոր Դավիթ Գրիգորյանի գործողություններում առկա է դիտավորություն, քանի որ վերջինս տեղեկացված է եղել, որ օրակարգային հարցը եղել է դատավոր Դանիբեկյանի վարույթում քննվող քրեական գործը և իր կողմից տրված մեկնաբանությունը վերաբերել է հենց այդ գործին։ Փոխնախարար Սուրեն Գրիգորյանը հայտարարեց, թե դիտավորության բացակայության դեպքում առկա է անփութություն և, եթե անգամ վերագրվող խախտումը ճիշտ չի մատնանշվել միջնորդությամբ, ապա դա չի կարող հիմք հանդիսանալ այն մերժելու համար։

Դատավոր Դավիթ Գրիգորյանի ներկայացուցիչ Սիրանուշ Սահակյանն էլ նշեց, որ անձի մեղքը հիմնավորվում է ապացույցների, այլ ոչ թե՝ եզրահանգումների հիման վրա։ Ավելին, առ այս պահը վարույթ հարուցող մարմինը չի հստակեցրել՝ արդյոք ձայնագրությունն ամբողջությամբ է վերծանված, մինչդեռ, ապացույցների ներկայացման բեռը դրված է վարույթ հարուցող մարմնի վրա, ըստ Սահակյանի՝ ձայնագրությունն ամբողջությամբ չի վերծանված։ Սահակյանը նաև արձանագրեց, որ վարույթ հարուցող կողմը չի կարողացել հստակեցնել նաև մեղքը, ինչը վկայում է, որ մեղքը գոյություն չունի, հետևաբար, միջնորդությունը ենթակա է մերժման։ Դատավոր Դավիթ Գրիգորյանն էլ արձանագրեց՝ վարույթ հարուցող կողմը նույնիսկ առ այս պահը չի կողմնորոշվել՝ դատավորն իրեն վերագրվող ենթադրյալ արարքը կատարել է դիտավորությամբ, թե անփութությամբ։ Ներկայացված փաստարկները բավարար չեն՝ արձանագրելու, որ իր կողմից արված հայտարարությունները կարծիք են, ոչ թե՝ դատողություն։

Հեղինակ՝ Իզաբել Սահակյան

Աղբյուր` Փաստինֆո