Փաստ ինֆո

Գորիս համայնքի «Գուսան Աշոտի անվան մշակույթի կենտրոն» ՀՈԱԿ-ի տնօրեն Հայկ Խաչատրյանը գրավի դիմաց ազատ է արձակվել։ Այս մասին «Փաստինֆո»-ն տեղեկացավ փաստաբան Րաֆֆի Ասլանյանից։

Հիշեցնենք՝ Գորիսի մշակույթի կենտրոնի տնօրենը հունիսի 17-ին ձերբակալվել էր՝ նախընտրական քարոզչությանը մասնակցելուն խոչընդոտելու կասկածանքով։ Ըստ պաշտոնական վարկածի՝ հունիսի 15-ին, ժամը 14.55-ին, ոստիկանության Գորիսի բաժնում Գորիսի մշակույթի կենտրոնի աշխատակցուհիներից մեկը հաղորդում էր տվել, որ ժամը 12.00-ի սահմաններում Գորիսի մշակույթի կենտրոնի տնօրենը արգելել է իրեն մասնակցելու Նիկոլ Փաշինյանի նախընտրական քարոզարշավին՝ սպառնալով ազատել աշխատանքից: Նախապատրաստված նյութերով ոստիկանության Գորիսի բաժնում հարուցվել է քրեական գործ՝ ՀՀ քրեական օրենսգրքի 149.1-րդ հոդվածի 2-րդ մասի 1-ին կետի հատկանիշներով։ Հունիսի 17-ին մշակույթի կենտրոնի տնօրենը ձերբակալվել է, իսկ երկու օր անց՝ դատարանի որոշմամբ կալանավորվել։ Քրեական գործով նախաքննությունն արդեն ավարտվել է, քրեական գործն այժմ գտնվում է Սյունիքի մարզի ընդհանուր իրավասության դատարանի դատավոր Նապոլեոն Օհանյանի վարույթում, որն, ի դեպ, բոլորովին վերջերս նշանակվել էր Սյունիքի մարզի առաջին ատյանի ընդհանուր իրավասության դատարանի նախագահ։

Քրեական գործի՝ դատաքննության նախապատրաստման փուլում դատարանը քննարկել է Հայկ Խաչատրյանի խափանման միջոցի հարցը, մասնավորապես, պաշտպանության կողմը միջնորդությունը՝ Հայկ Խաչատրյանի նկատմամբ ընտրված խափանման միջոց կալանավորումը փոխելու և նրա նկատմամբ ընտրել անազատության հետ կապ չունեցող խափանման միջոց, այդ թվում՝ գրավ, ընտրելու վերաբերյալ ու մերժել։ Փաստաբան Րաֆֆի Ասլանյանի փոխանցմամբ՝ դատարանի սույն որոշումը բողոքարկվել է վերաքննության կարգով և բեկանվել։ Վերաքննիչ քրեական դատարանը՝ դատավոր Մխիթար Պապոյանի նախագահությամբ, բավարարել է Հայկ Խաչատրյանի նկատմամբ ընտրված խափանման միջոց կալանավորումը գրավով փոխարինելու մասին պաշտպանների միջնորդությունը՝ գրավի չափ սահմանելով 1 մլն ՀՀ դրամը։ Դատարանի դեպոզիտ հաշվին փոխանցելուց Հայկ Խաչատրյանն ազատ է արձակվել «Գորիս» ՔԿՀ-ից։

Ի դեպ, նախաքննության փուլում առաջին ատյանի դատարանը Հայկ Խաչատրյանի նկատմամբ կալանավորումը՝ որպես խափանման միջոց ընտրելիս հավանական է համարել կալանավորման հիմքերից միայն գործի քննությանը խոչընդոտելու ռիսկը և, թեև նախաքննության ավարտից հետո, երբ գործով բոլոր վկաներն արդեն ցուցմունքներ տվել են, հետևաբար, խոչընդոտման ռիսկն արդեն նվազել էր, դատավոր Նապոլեոն Օհանյանն անփոփոխ էր թողել մինչդատական վարույթում կիրառված խափանման միջոց կալանքը՝ կրկին հավանական համարելով միայն խոչընդոտման հավանականությունը։ Վերաքննիչ քրեական դատարանն արձանագրել է, որ այդ ռիսկը նվազել է։

Հեղինակ՝ Իզաբել Սահակյան

Աղբյուր` Փաստինֆո