Փաստ ինֆո

Դերսիմի ալևիացած հայերն ամբողջ 20-րդ դարի ընթացքում ստիպված եղան թաքցնել իրենց ծագումը, այսօր վերադառնում են հայկական արմատներին։ 

«Վերադարձ» մշակութային բարեգործական հիմնադրամը շարունակում է իր առաքելությունը։ Վերջին տասը տարիների ընթացքում տասնյակ հայեր են նոր կրոն ստացել ու մկրտվել։

Ահմեդը ծագումով հայ է՝ Բերսիմից։ «Վերադարձ» հիմնադրամի ներկայացուցիչները և նախագահը հավաքվել էին Ջրվեժի եկեղեցում՝ նույն առիթով։ Ահմեդը կնքվել է ու ընդունել քրիստոնեությունը, ստացել հայկական անուն։ Հիմնադրամի նախագահը վստահեցնում է՝ երջանիկ օրերից մեկն է, ականատես են լինում Արևմտյան Հայաստանի հայության վերարտադրման պրոցեսի շարունակությանը, որը հնարավոր չէ կանգնեցնել։

«Եթե 10-15 տարի առաջ այդ պրոցեսը անհնար էր թվում, ապա այսօր այդ ալիքը այնքան հզոր է, արմատները այնքան հզոր են, որ մի փոքրիկ կայծ է պետք, որ հայությունը վերադառնա իր արմատներին ու ընդունի Քրիստոնեություն»,- հայտնել է Արագած Ախոյանը։

Այսօր էլ տասնյակ հայորդիներ սպասում են իրենց կնունքին, որը կկատարվի «Վերադարձ» հիմնադրամի և ընկերների միջոցներով։

1915 թվականից հետո էլ Թուրքիայում մնացած շատ հայեր փոխել են իրենց կրոնը, բայց ոչ՝ ինքնությունը: Այսպիսով ձևավորվել է մուսուլման, ալևի հայերի խումբը: Դերսիմի կոտորածները վերապրած հայերը բռնի իսլամացվել են, հեռացել իրենց հայկական արմատներից ու ինքնությունից: Հնագույն ժողովուրդներից հայերի մի հատված դեռ շարունակում է ապրել Դերսիմում: Ոմանք ինչ-որ չափով պահպանել են իրենց կրոնը, բայց մեծ մասը կրոնափոխ է եղել` չմոռանալով, սակայն, իրենց էթնիկ ինքնության մասին: Չլինելով քրիստոնյա, իրենց հայ են համարում։ Դերսիմցիները տարիներ շարունակ մկրտվել են, լեզվի դասընթացներ ստացել, այցեր կազմակերպել դեպի Երևան։

Մանրամասները տեսանյութում

Աղբյուր` Փաստինֆո