Փաստ ինֆո

Իշխանությունները, չգիտես ինչու, որոշեցին այդ պողպատյա մանդատը կիրառել նաև լրատվամիջոցների նկատմամբ, մինչդեռ դա լավագույն ուղին չէ, հակառակը, նրանք պետք է փորձեն ապահովել լրատվամիջոցների և լրագրողների ազատ գործունեությունը՝ վերացնելով այս սահմանափակումները։ Այս մասին «Փաստինֆո»-ի հետ զրույցում ասաց «Խոսքի ազատության պաշտպանության կոմիտեի» նախագահ Աշոտ Մելիքյանը։

Ինչպես արդեն տեղեկացրել ենք՝ ԱԺ-ն արգելել է «Panorama,am» լրատվական կայքի լուսանկարիչ Լիլիան Գալստյանի մուտքն ԱԺ՝ պատճառաբանելով, թե իբրև նա լուսանկարել է, թե ինչպես են զինվորական հագուստով անձինք արգելում լրագրողների տեղաշարժը ԱԺ շենքում՝ հասարակությանը տեղեկացնելով այս մասին խոսուն լուսանկարների միջոցով։

Աշոտ Մելիքյանը «Փաստինֆո»-ի հետ զրույցում հայտնեց, որ այդ քայլը բացահայտ կամայականություն է և որևէ լուրջ հիմնավորում չունի, քանի որ նմանատիպ կադրեր հանդիպել ենք նաև այլ լրատվամիջոցներում և կարծես թե ընտրովի մոտեցում է ցուցաբերվել, ընդ որում, խոսքը գնում է այնպիսի ֆոտոլրագրողի մասին, որը մշտապես հարգանքով է մոտեցել լրագրողական էթիկայի կանոններին։

«Եթե ԱԺ անվտանգությունը պահպանող անձինք պետք է իրենց դեմքերը պահեն, ապա կարող են դիմակ կրել կամ հենց նկարահանման պահին զգուշացնեն, որ իրենք ԱԱԾ ծառայողներ են և չպետք է նկարահանվեն։ Ամեն դեպքում, առանց որևէ լուրջ պարզաբանման միանգամից նման քայլ անելը և լրագրողին հավատարմագրումից զրկելը կոպիտ խախտում է և շատ վատ նախադեպ՝ ցանկացած լրագրողի նկատմամբ ցանկացած սահմանափակում իրականացնելու առումով»,- նշեց նա՝ հավելելով, որ «Խոսքի ազատության պաշտպանության կոմիտեն» և գործընկեր կազմակերպություններն այսօր համապատասխան հայտարարությամբ հանդես կգան։

Բացի դա, «Panorama,am» լրատվական կայքի ֆոտոլրագրողը կարող է Վարչական դատարանի միջոցով վիճարկել իր մուտքն ԱԺ արգելելու մասին որոշումը, եթե ԱԺ-ն սեփական նախաձեռնությամբ չվերացնի այն, իսկ փորձագիտական եզրակացության անհրաժեշտության դեպքում ֆոտոլրագրողը կարող է օգտագործել նաև «Խոսքի ազատության պաշտպանության կոմիտեի» հայտարարության տեքստը, որը կհրապարակվի այսօր։

Անդրադառնալով ԱԺ-ում լրագրողների ազատ շարժի սահմանափակման հանգամանքին՝ Մելիքյանը նշեց, որ այդ հարցի առնչությամբ դատապարտում են այդպիսի մոտեցումները, դրանք չէին բխում որևէ իրավական ակտից։ Սահմանափակումները, փաստորեն, կիրառելուց հետո միայն հրապարակվել է ԱԺ նախագահի որոշում, իսկ դրանից ընդամենը մի քանի օր առաջ հայտարարվել է, որ նման որոշում գոյություն չունի։

«Այսինքն՝ հուլիսի 30-ին գոյություն չի ունեցել, իսկ օգոստոսի 2-ին հաջորդ իսկ աշխատանքային օրը, երբ արդեն կիրառվել են այդ սահմանափակումները, որոշում է ընդունվել։ Սրանք նույնպես առանց լուրջ քննարկումների, առանց որևէ լուրջ հիմնավորումների սահմանափակումներ են, որոնք գնահատում ենք որպես ոտնձգություն՝ ընդդեմ լրագրողական ազատ գործունեության»,- նշեց նա։

Դիտարկմանը, որ այս իշխանությունների կողմից պարբերաբար սահմանափակումներ են եղել խոսքի ազատության, լրագրողների գործունեության՝ ռազմական դրության, արտակարգ դրության պայմաններում, ինչ նպատակ են հետապնդում իշխանությունները՝ նման սահմանափակումներ մտցնելով, ինչ են փորձում թաքցնել, Մելիքյանն արձագանքեց՝ նշելով, որ, եթե արտակարգ դրության և հատկապես ռազմական դրության ժամանակ որոշ սահմանափակումները՝ ոչ բոլորն իհարկե, հասկանալի էին, ընկալելի էին։ Մելիքյանը նաև հիշեցրեց կորոնավիրուսի համավարակով պայմանավորված սահմանափակումները՝ կառավարության որոշմամբ, որոնք նրա դիտարկմամբ անհիմն էին և լավ էր, որ կառավարությունն, անսալով լրագրողական կազմակերպությունների և լրագրողական հանրության պահանջներին, սկզբում մեղմացրեց, ապա վերացրեց այդ սահմանափակումները։

«Կցանկանայի, որ այս պարագայում նույնպես իշխանությունը հաշվի նստի լրագրողական հանրության պահանջների հետ և այս անհիմն սահմանափակումները վերացնի։ Իսկ թե ինչ նպատակներ են հետապնդում, անկեղծ ասած, քաղաքակիրթ, ժողովրդավար հասարակության համար դրանք անհարիր են, բայց նաև կարծում եմ, որ իշխանությունները, չգիտես ինչու որոշեցին այդ պողպատյա մանդատը կիրառել նաև լրատվամիջոցների նկատմամբ, մինչդեռ դա լավագույն ուղին չէ և կարծում եմ՝ հակառակը, նրանք պետք է փորձեն այս սահմանափակումները վերացնելով, ապահովեն լրատվամիջոցների և լրագրողների ազատ գործունեությունը»,- նշեց Մելիքյանը։

Աղբյուր` Փաստինֆո