Փաստ ինֆո

Այսօրվա ընդդիմությունը որդեգրել է մի գործելաոճ, որ օգտվի ԱԺ-ի ընձեռած լծակներից և իր պայքարին նոր թափ հաղորդի։ Լրագրողների հետ զրույցի ժամանակ ասաց «Հայաստան» խմբակցության՝ ԱԺ փոխնախագահի թեկնածու Իշխան Սաղաթելյանը։

Պատգամավորը նշեց՝ տեղեկություն ունեին, որ իշխանությունները դեմ էին ԱԺ փոխնախագահի պաշտոնում իր առաջադրմանը.
«Իշխանությունների հետ որևէ բանակցություն չկա, և մենք չենք կարող այս իշխանության հետ այս պայմաններում բանակցել նման հարցերի շուրջ։ Չենք կարող հաշտ ու համերաշխ լինել այս իշխանության հետ, իսկ ընտրության գնացել ենք, որ այդ ճանապարհով հեռացնենք այս իշխանությանը։ Հիմա շարունակում ենք մեր պայքարը, նահանջ չկա, մեր օրակարգում որևէ բան չի փոխվել, որովհետև երկրի առջև կանգնած մարտահրավերները նույնն են, իսկ երկրում ստեղծված ճգնաժամը հաղթահարված չէ»,-ասաց Իշխան Սաղաթելյանը։

Վերջինս նշեց, որ ԱԺ փոխնախագահն ունի մի շարք լծակներ, այդ թվում արտահերթ խոսքի իրավունք։

Հարցին, թե դա ի՞նչ է տալու իրենց, Իշխան Սաղաթելյանն ասաց. «Երբ ՔՊ կուսակցության ղեկավարը գա ԱԺ, և մատ թափ տա պատգամավորների վրա, ես անմիջապես կօգտվեմ այդ հնարավորությունից և կասեմ այն, ինչ պետք է ասեմ»,-նշեց պատգամավորը։

Իշխան Սաղաթելյանը վստահեցրեց, որ ԱԺ փոխնախագահ ընտրվելու դեպքում իր գործունեությունը բխելու է ընդդիմության օրակարգից։

Աղբյուր` Փաստինֆո