Փաստ ինֆո

Ես որևէ առնչություն չունեմ հայրիկիս՝ դատարանի նախագահի պաշտոնում նշանակվելու հետ։ Որևէ առնչություն չունեմ և չեմ կարող ունենալ։ Այս մասին լրագրողների հետ զրույցում ասաց ՀՀ գլխավոր դատախազի տեղակալ, ՀՀ երկրորդ նախագահի և մյուսների գործով մեղադրանքը պաշտպանող դատախազ Գևորգ Բաղդասարյանը։

Մասնավորապես, լրագրողը հետաքրքրվել էր, թե ինչով է պայմանավորված իրենց ընտանիքի առաջխաղացումը՝ հոր՝ Սուրեն Բաղդասարյանին Լոռու մարզի ընդհանուր իրավասության դատարանի նախագահի պաշտոնում նշանակվելու և այս տարիների ընթացքում իր՝ Գևորգ Բաղդասարյանի, առաջխաղացմանը, արդյոք այս ամենի հիմքում ընկած է դատախազի էնտուզիազմը, նվիրումը՝ դատական գործընթացներին, որոնք Նիկոլ Փաշինյանի համար խիստ էական են։

Գևորգ Բաղդասարյանը, պատասխանելով հարցին, նշեց, որ ինքն էնտուզիազմ և նվիրում ունի իր աշխատանքի նկատմամբ, նույն էնտուզիազմով ներկայացել է բոլոր դատական նիստերին։

«Եթե որևէ մեկը կարող է նայել աչքերիս մեջ և հերքել, ցանկացածը, որն առնչվել է իմ աշխատանքի հետ, առաջարկում եմ՝ թող հրապարակային հայտարարություն անի»,- նշեց Բաղդասարյանը՝ ընդգծելով, որ ամենաերկարն աշխատել է որպես Երևան քաղաքի դատախազ, հետևաբար, մեկնաբանությունները, թե սույն գործով ներգրավվելուց հետո, նշանակվել է Երևան քաղաքի դատախազ՝ ճիշտ չեն։

Ինչ վերաբերում է Սուրեն Բաղդասարյանի՝ դատարանի նախագահի պաշտոնում նշանակվելու վերաբերյալ հարցին, Գևորգ Բաղդասարյանը նշեց, որ տրամաբանությունից դուրս է, որ գլխավոր դատախազի տեղակալը որևէ ազդեցություն կարող է ունենալ դատարանի նախագահի ընտրության հարցում, որովհետև դատարանի նախագահ ընտրվում է ԲԴԽ-ի կողմից և ինքը որևէ կապ ունենալ չի կարող։

Դիտարկմանը, որ մամուլում շրջանառվող տեղեկությունների համաձայն՝ նույն ԲԴԽ նախագահի պաշտոնակատար Գագիկ Ջհանգիրյանը փորձում է դատախազության միջոցով պատժիչ մեխանիզմներ կիրառել չենթարկվող դատավորների նկատմամբ, Բաղդասարյանն արձագանքեց՝ նշելով, որ հրապարակվող տեղեկությունները ճիշտ չեն, պաշտոնապես հերքում է։

Լրագրողի դիտարկմանը, թե Բաղդասարյանը շատ է վստահ, Բաղդասարյանը նշեց, որ այո, շատ. «Այնքանով եմ վստահ, ինչքանով, որ վստահ եմ նրանում, որ ես այս գործով ներգրավվելուց հետո չեմ դարձել Երեւանի դատախազ, բայց Դուք շարունակում եք պնդել, որ ես այս գործով ներգրավվելուց հետո դարձել։ Սուտ է»։

«Փաստինֆո»-ի հաղորդմամբ՝ Գեւորգ Բաղդասարյանը Երեւանի դատախազ է նշանակվել իշխանափոխությունից հետո՝ 2018թ. հուլիսի 11-ին, իսկ երկու տարի հետո՝ 2020 թ. Օգոստոսին, նշանակվել արդեն ՀՀ գլխավոր դատախազի տեղակալ։

Աղբյուր` Փաստինֆո