Փաստ ինֆո

Գործադիրում բազմաթիվ նշանակումներ են եղել այսօր, իսկ օրենսդիրում ընտրության արդյունքում փոխնախագահներ են ընտրվել։ Մեծամասնությունից։ Բայց գիտեք՝ ինչն է մի տեսակ ականջ ծակում։ Այդ մենք ենք ասում՝ մեծամասնություն, մեծամասնական, քպական, իրենք իրենց ասում են՝ «իշխանական»։ Եվ շեշտում են՝ իշխանական պատգամավորներն էլ լրագրողների հետ նույն վայրում ճեպազրույցներ կունենան․․․ Ասես հատուկ պատիվ են անում լրագրողներին։ Այս նախադասությունը լսեցի մի կարճ ընթացք հետևելով ԱԺ ուղիղ հեռարձակվող նիստը, ասողն էլ՝ օրենսդիրի նորընտիր ղեկավարն էր։

ՈՒզում ես ասել՝ «իշխանականը» ո՞րն է, միանգամից «արքայական» ասա․․․

Ի դեպ, բոլոր ժամանակների իշխանություններից երբևէ չեմ լսել, որ իրենք իրենց «իշխանական» բնորոշումը տան։ Լրագրողները գուցե՝ ասել են, բայց խորհրդարանական մեծամասնության ներկայացուցիչը․․․

Ընդհանրապես, նրանք կարծես մոռացել են, որ ժողովրդավարության թևիկների վրա են իշխանության եկել՝ եկած պահից փետրահան անելով այդ թևիկները։

Մի հետաքրքիր դիտարկում էլ․ պարզվում է՝ բոլոր քպականները պողպատե մանդատ ունեն իրենց ձեռքին կամ գրպաններում պահած և պարբերաբար ընդդիմության աչքն են մտցնում, թե բա՝ ժողովուրդը մեզ տվել ու ասել է՝ տնտեսությունը զարգացրեք, մեր կյանքը բարելավեք և այլն, և այլն։ Սակայն, զարմանալի է՝ քպականներին պողպատե մանդատ տված ժողովուրդն իր ընտրյալների առաջ Հայաստանի սահմանները անառիկ պահելու, պետության պաշտպանությունը և անվտանգությունը ապահովելու մանդատ չի՞ տվել։ Թե՞ ասել է՝ թշնամի պետությունների հետ սահմանները բացեք, էժան ապրանք առնենք-ծախե՞նք․․․Ամենակարևորի՝ մեր պետության անվտանգությանն ուղղված լրջագույն սպառնալիքների մասին ո՛չ մանդատ տվողները, ո՛չ էլ՝ մանդատ ստացողները չեն հիշում և չեն նշում։

Ընդդիմությանը ձայն տված ժողովրդի ներկայացուցիչ որպես ես, իմ ընտանիքը, իմ շրջապատը, ընկերները անվտանգության և պաշտպանությա՛ն հարցերն ենք կարևորում, քանզի առանց անվտանգության՝ տնտեսական զարգացում և առաջընթաց՝ չկա և չի կարող լինել։

Իրականում ԱԺ լոլոները ոչ մեկին չեն հետաքրքրում, քանի որ լոլոների հեղինակներն են իրենց կամազրկությամբ և հպատակությամբ կապիտուլյացիոն պայմանագիր ստորագրած անձին ծափահարություններով և հոտընկայս դիմավորել, այդ լոլոների հեղինակներն են, որ խորհրդարանում հանդես են եկել բացառապես որպես գլխաքանակ, նրանց խուլուհամր լինելու հետևանքով է, որ հիմա էլ Հայաստանի սահմաններն է ծվատում թշնամին։ Եվ այնպես չէ, որ նախորդ խորհրդարանի՝ փաշինյանական ուսապարկներն այս խորհրդարանում փոխեցին իրենց բովանդակությունը։

Քաղպայմանագրի խորհրդարանականները մեղավոր են և՛ 44-օրյա պատերազմի պարտության, և՛ հետպատերազմական շրջանում թշնամի պետության կողմից Հայաստանի բարձունքները և սահմանները բզկտելու, սահմանը խախտելու և ՀՀ սուվերեն պետության տարբեր ուղղություններով պարբերաբար կրակահերթեր տեղալու համար․ որպես հետևանք՝ մենք ունենք ադրբեջանական զինուժի նախահարձակ կրակոցներից զոհվածներ և վիրավորներ։

Հեղինակ՝ Ա․Ե․

Աղբյուր` Փաստինֆո