Փաստ ինֆո

Վերաքննիչ քրեական դատարանի դատավոր, «Դատավորների ընդհանուր ժողովի Էթիկայի և կարգապահական հարցերի հանձնաժողովի» նախագահ Սերգեյ Մարաբյանի նկատմամբ կարգապահական վարույթ է հարուցվել։ Այս մասին «Փաստինֆո»-ի հետ զրույցում ասաց փաստաբան Միքայել Շխիմյանը՝ ընդգծելով, որ իրենց առաքելությանը հավատարիմ դատավորների նկատմամբ ճնշումները շարունակվում են։

Դատավոր Սերգեյ Մարաբյանի նկատմամբ կարգապահական վարույթը հարուցվել է ՀՀ գլխավոր դատախազի հաղորդման հիման վրա՝ ԱԺ նախկին նախագահ Արարատ Միրզոյանին ծեծի ենթարկելու գործով մեղադրյալներից մեկի՝ Ժիրիկ Սիրեկանյանի խափանման միջոցը փոխելու համար։ Մասնավորապես, ինչպես արդեն տեղեկացրել էինք, առաջին ատյանի դատարանը, քննելով Սիրեկանյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը, որոշել է բավարարել այն, ինչը պաշտպանության կողմը վիճարկել է։ Վերաքննիչ քրեական դատարանը՝ դատավոր Սերգեյ Մարաբյանի նախագահությամբ, բավարարել էր փաստաբանի բողոքը՝ բեկանելով Սիրեկանյանին կալանավորելու մասին առաջին ատյանի դատարանի որոշումը, ինչի դեմ էլ վճռաբեկ բողոք էր ներկայացրել արդեն դատախազությունը, որի արդյունքում այն բեկանվել էր։

Փաստաբան Միքայել Շխիմյանը «Փաստինֆո»-ի հետ զրույցում հայտնեց, որ վերաքննիչ դատարանը կալանավորումը բեկանելու որոշում էր կայացրել՝ հիմք ընդունելով մեղադրյալի այլուրեքությունը՝ դեպքի վայրում չգտնվելու հանգամանքը փաստող տվյալները։ Այսինքն՝ վերծանումներ են եղել, որոնք հաստատել են, որ դեպքի ժամին մեղադրյալը գտնվել է այլ տեղանքում։ Գործի նյութերում առկա է եղել նաև հեռախոսազրույցների վերծանման արդյունքում ձեռքբերված տվյալներ, թե իբրև դեպքից հետո երկու անձ խոսելու ընթացքում ասել են, թե մեղադրյալը դեպքի ժամանակ ակտիվ է իրեն պահել։ Փաստաբանն ընդգծեց, որ ապացուցողական ավելի բարձր արժեք իրենից ներկայացնում է մարդու այլուրեքությունը և,ըստ փաստաբանի, օբյեկտիվորեն որևէ այլ որոշում քան, քննիչի միջնորդությունը մերժելը, տվյալ գործով հնարավոր չէր կայացնել։

Բացի դա՝ Շխիմյանը հիշեցրեց, որ այս գործի կապակցությամբ զեկույց-խորհրդակցություն է անցկացվել ՀՀ վարչապետի մոտ, որը հեռարձակվել է նաև հեռուստատեսությամբ, որին, ի թիվս այլոց, մասնակցում էր նաև ՀՀ վճռաբեկ դատարանի նախագահը։

«Դատավոր Սերգեյ Մարաբյանը իր վարույթում քննվող դատական նիստի ընթացքում կողմերին հայտնել է, որ քաջատեղյակ է սույն գործի կապակցությամբ տեղի ունեցած և հեռուստատեսությամբ լուսաբանված քննարկում-զեկույցի մասին, նշել, որ որևէ կողմնակի միջամտություն չի կարող որևէ ազդեցություն ունենալ իր կողմից արդարադատություն իրականացնելու իր առաքելության վրա, և նշված համատեքստում կողմերին առաջարկել է նաև կարծիք հայտնել իրեն բացարկ հայտնելու կապակցությամբ, և կողմերը բացարկի միջնորդություն չեն ներկայացրել, արդյունքում դատավոր Մարաբյանը քննել և մերժել է անձին կալանավորելու վերաբերյալ միջնորդությունը։ Դատավորի նշված որոշման դեմ դատախազության կողմից բերվել է վճռաբեկ բողոք, որը ընդունվել է վարույթ և որոշում է կայացվել Սերգեյ Մարաբյանի կայացրած որոշումը բեկանելու մասին»,- նշեց Շխիմյանը՝ հավելելով, որ Վճռաբեկ դատարանի որոշումից հետո դատավոր Սերգեյ Մարաբյանի նկատմամբ վարույթ է հարուցվել։

Փաստաբան Շխիմյանի կարծիքով՝ ինչպես դատավոր Վարդան Գրիգորյանի, այնպես էլ՝ դատավոր Մարաբյանի նկատմամբ կարգապահական վարույթներ են հարուցվել՝ դատարանների անկախությանը միջամտելու, դատավորների նկատմամբ քողարկված ազդակներ փոխանցելու նպատակով, հատկապես, քաղաքական ենթատեքստ պարունակող քրեական գործով՝ համարձակ որոշումներ կայացնելիս։

«Համարձակ որոշումները հանրության համար են համարձակ, իրենք պարզապես արդարադատություն են իրականացնում։ Պարոն Մարաբյանի պես դատավորի համար, վստահ եմ, որ միևնույն է, թե ով է իր առջև, նա արդարադատություն է իրականացնում»,- նշեց Շխիմյանը։

Հեղինակ՝ Իզաբել Սահակյան

Աղբյուր` Փաստինֆո