Փաստ ինֆո

Տարակուսելին այն է, որ լրագրողների տեղաշարժի սահմանափակումը հատկապես վերաբերում է իշխանական խմբակցության մատույցներին։ Այսինքն՝ լրագրողներին արգելվում է բացառապես շփվել իշխանական պատգամավորների հետ։ Լրագրողների հետ զրույցի ժամանակ այս մասին ասաց «Պատիվ ունեմ» դաշինքի պատգամավոր Թագուհի Թովմասյանը։

Պատգամավորը չի հասկանում, թե ինչով են պայմանավորված այս սահմանափակումները և ինչ նպատակ են հետապնդում։

«Եթե լրագրողներն այստեղ են, ինչքա՞ն պետք է փախչեն լրագրողներից։ Սա հանրային դաշտ է, հանրային աշխատանք, և մենք ընտրված մարդիկ ենք ու նաև հաշվետու։ Պատգամավորը պարտավոր է իր գործունեության մասին հանրային դաշտում անընդհատ տեղյակ պահի քաղաքացիներին։ Ստացվում է՝ շատ պատգամավորներ չեն ուզում հաշվետու լինել իրենց ընտրողներին, թե ինչով են զբաղված խորհրդարանում»,-ասաց Թագուհի Թովմասյանը։

Վերջինս հույս հայտնեց, որ ԱԺ ղեկավարությունն ամեն դեպքում կվերանայի այս որոշումը։ Նրա խոսքով լրագրողների տեղաշարժի սահմանափակումը ոտնահարում է լրագրողների ազատ աշխատանքի մասով։

«Պողպատյա մանդատը փաստացի կիրառվեց նաև լրագրողների նկատմամբ։ Լրագրողները, որ սկսել են խանգարել իշխանություններին, անցանկալի հարցեր են տալիս, սենյակների դուռը երբ թակում են ու հարցնում՝ կարող են հարցազրույց վերցնել, դա համարվում է անթույլատրելի»,-նշեց պատգամավորը։

Թագուհի Թովմասյանը նշեց, որ նախկին իշխանությունների օրոք եղել են սահմանափակումների փորձեր, սակայն դրանք ձախողվել են և լրագրողներն ավանդույթի ուժով շարունակել են խորհրդարանում ազատ իրականացնել իրենց աշխատանքը։

«Պատրաստվում եմ բոլոր հնարավոր ձևերով պայքարել, բայց չեմ կարող ասել, թե ինչի կհասնեմ»,-նշեց Թագուհի Թովմասյանը։

Հարցին՝ եթե «Հայաստան» խմբակցության պատգամավորներ Արթուր Սարգսյանի և Մխիթար Զաքարյանի մասով պահանջը չկատարվի, ընդդիմությունը պատրաստվու՞մ է բոյկոտել, Թագուհի Թովմասյանն ասաց, որ չեն մասնակցի նիստերին, եթե կալանավորված գործընկերներին ազատ չարձակեն։

Աղբյուր` Փաստինֆո