Փաստ ինֆո

Վերաքննիչ քրեական դատարանում՝ դատավոր Մնացական Հարությունյանի նախագահությամբ, կայացել է Գորիսի համայնքապետ Առուշ Առուշանյանին կալանավորելու որոշման դեմ բողոքի քննությունը։ Պաշտպանության կողմը միջնորդություն է ներկայացրել՝ դատավորին ինքնաբացարկ հայտնելու մասին։

Փաստաբան Էրիկ Ալեքսանյանը լրագրողների հետ զրույցում հայտնեց, որ դատարանից որոշակի պարզաբանում է պահանջել՝ գործերի մակագրման համակարգի առգրավման վերաբերյալ։

«Դատարանը փաստացի նաև հաստատեց այդ տեղեկատվությունը, որ տեղի է ունեցել սերվերի առգրավում, ինչը հետագայում հնարավորություն է ստեղծել Վերաքննիչ քրեական դատարանի նախագահի կողմից ձեռքով մակագրում իրականացնելու համար»,- նշեց Ալեքսանյանը՝ հավելելով, որ դատարանից հետաքրքրվել է, թե արդյո՞ք նախագահող դատավորը փորձել է պարզել, թե ինչ սկզբունքով է հենց ինքն ընտրվել նախագահող դատավոր՝ սույն բողոքի գործով, սակայն բավարարող պատասխան դատարանն այդպես էլ չի տվել։

Ալեքսանյանը հայտնեց, որ նախագահող դատավորը նշել է, որ դատարանի նախագահի հետ ոչ մի նմանատիպ հարց չի քննարկվել, առհասարակ՝ գործը որևէ մեկի հետ չի քննարկել։

Ինչ վերաբերում է միջնորդության հիմքերին, ապա Ալեքսանյանի փոխանցմամբ, նախադեպային իրավունքի համաձայն՝ դատարանը, դատավորը ոչ միայն պետք է լինի անկողմնակալ, անաչառ, այլև՝ պետք է այդպիսին երևա։

«Ներկա պահին՝ միգուցե այդ դատավորն անկողմնակալ է, անաչառ և օբյեկտիվ, բայց արդյոք օբյեկտիվ իրականության մեջ առկա իրողությունները, մասնավորապես, Սյունիքի բոլոր համայնքների ղեկավարների կալանավորման օրինականության վերաբերյալ բողոքները մուտք անելուց հետո ԱԱԾ գործողությունները չեն վկայում այն մասին, որ այս բոլոր դատավորները, որոնք համայնքների ղեկավարների բողոքների քննություն են իրականացնում, ընտրվել են պատահաբար»,- նշեց Ալեքսանյանը։

Դատական նիստի ընթացքում դատավորը նաև հարց է բարձրացրել առ այն, որ եթե մեկ այլ դատավորի մակագրվեր, նույն իրավիճակը կստեղծվեր, ինչին ի պատասխան Ալեքսանյանը նշել է, թե ինչու գործը չի մակագրվել դատավորներ Արշակ Վարդանյանին, Մխիթար Պապոյանին, Վազգեն Ռշտունուն, Ալեքսանդր Ազարյանին, Սերգեյ Մարաբյանին, այլ՝ մակագրվել է հենց իրեն։ Դատավորի հարցին՝ արդյոք նույն իրավիճակը չէր ստեղծվի, եթե գործը մակագրվեր այդ դատավորներին, Ալեքսանյանը նշել է, որ այդ դատավորներին գործը չէր մակագրվի, քանի որ մակագրությունը տեղի է ունեցել ձեռքով։ Փաստաբանը վստահ է՝ բողոքի քննությունը չի եղել պատահական։

«Եթե այս բողոքը մակագրվեր Արշակ Վարդանյանին և, եթե անգամ նա կայացներ որոշում, որը մեզ կարող էր չգոհացնել, մենք ասելիք չէինք ունենա, քանի որ պրակտիկայում բազմիցս ենք տեսել Արշակ Վարդանյանի դրսևորած վարքագիծը, որ միշտ որոշումներ կայացվել է՝ ելնելով Սահմանադրությունից և օրենքից »,- նշեց Ալեքսանյանը։

Աղբյուր` Փաստինֆո