Փաստ ինֆո

Հայաստանի, Արցախի շուրջ ստեղծված իրավիճակի և Հայաստանի ներքաղաքական կյանքի միջև հակասություն կա: Այս մասին լրագրողների հետ զրույցում ասաց «Պատիվ ունեմ» խմբակցության պատգամավոր, ռազմական փորձագետ Տիգրան Աբրահամյանը։

Վերջինս արձանագրեց, որ իշխանության քննարկումները և առաջ քաշած մոտեցումները որևէ առնչություն չունեն երկրի շուրջ ստեղծված սպառնալիքների հետ:

Փորձագետի համոզմամբ՝ սահմանային այս լռությունը դեռևս չի նշանակում իրավիճակի հանգուցալուծում, լարվածության ռիսկերը բավականին բարձր են: Տիգրան Աբրահամյանը նաև նշեց, որ Ադրբեջանը շարունակելու է գործողությունները՝ իր համար կարևորագույն դիրքերի գրավելու ուղղությամբ, ինչը հնարավորություն կտա հետագայում արդյունավետ վերահսկողություն ունենալ Հայաստանի ռազմավարական օբյեկտների վրա։

«Ստեղծված իրավիճակը, եթե նույնիսկ որոշ ժամանակով դադարի, դա չի կարող մեզ երկարաժամկետ խաղաղություն և կայություն ապահովել»,-ասաց փորձագետը:

Նրա խոսքով՝ թշնամին փորձում է սահմանային լարումներով ճնշում գործադրել հայ հասարակության և իշխանությունների վրա և իրենց համար ցանկալի օրակարգ առաջ մղել.

«Անարժանապտիվ խաղաղությունը որևէ ձևով չի կարող մեր տարածաշրջանին երկարատև խաղաղություն ու անվտանգություն բերել: Այս տեսանկյունից պետք է նշել, որ այն քայլերը, որոնք դրված էին ու նախատեսված էին մեր երկրի համար անվտանգային միջավայր ստեղծելու, որևէ ձևով իրենց նպատակին չեն ծառայել»,-ասաց Աբրահամյանը և հավելեց, որ իշխանությունը պատերազմից հետո անվտանգության ապահովման ուղղությամբ որևէ պատշաճ քայլ չի իրականացնել:

Փորձագետը նաև ընդգծեց, որ ռազմական ոլորտում իրականացվող կադրային փոփոխությունները չեն կարող լուծել մեր երկրի առաջ դրված գլխավոր խնդիրները.

«Ցավով եմ արձանագրում, որ առաջնահերթությունները, որոնք կան մեր երկրի համար, առաջնահերթություն չեն գործող իշխանության համար։ Նրանք առաջնորդվում են այնպիսի սկզբունքներով, որոնք մեզ որևէ ձևով չեն կարող բերել հուսալիություն և անվտանգություն»,-ասաց Տիգրան Աբրահամյանը։

Աղբյուր` Փաստինֆո