Փաստ ինֆո

Այս իշխանությունը սիրում է հպարտանալ աննախադեպությամբ: Բազմաթիվ անգամներ գլխավոր հպարտ քաղաքացին հրավիրում է ասուլիսներ և ներկայացնում աննախադեպ փաստեր, միգուցե կարելի է ընդլայնել աննախադեպ փաստերի շրջանակը և դրա մեջ ներառել այն, որ նորագույն Հայաստանի պատմության մեջ առաջին անգամ գումարվում է Ազգային ժողով, որն ամբողջությամբ համալրված է: Այս մասին ԱԺ նիստին ասաց «Հայաստան» խմբակցության պատգամավոր Արթուր Ղազինայնը:

Նրա արձանագրմամբ՝ տեղի է ունեցել և շարունակվում է Հայաստանի իրավական կարգի տապալում, իրավական կարգը Հայաստանում կազմաքանդված է: Ղազինյանի խոսքով՝ Դատախազությունը և քննչական մարմինները վերածվել են քաղաքական իշխանության, նրանք կատարում են քաղաքական պատվերներ.

«Նիկոլ Փաշինյանի կողմից վերջերս կառուցողական աշխատանքի կոչ հնչեց: Դժվար էր լսել կոչ մի մարդուց, որն իր ամբողջ կենսագործունեության ընթացքում եղել է ապակառուցողական: Նախկինում լինելով Աժ պատգամավոր՝ նույնիսկ մեկ անգամ խնդրի լուծմանն ուղղված 4 էջանոց առաջարկություն չի ներկայացնել, որևէ բան կառուցելու, ստեղծելու, հիմնադրելու և զարգացնելու անկարողությունը բերել է ապակառուցողականության»-ասաց Ղազինյանը:

Ելույթից հետո նա հարց ուղղեց «Հայաստան» խմբակցության քարտուղար Արծվիկ Մինասյանին՝ ինչո՞վ է պայմանավորված «Հայաստան» դաշինքի պատգամավոր Մխիթար Զաքարյանին կալանավորելու որոշումը:

Արծվիկ Մինասյանն էլ մանրամասնեց, որ դեռևս Մխիթար Զաքարյանի պաշտոնավարումից առաջ 240 քմ տարածք հատկացված է եղել վարձակալության, հետագայում վարձակալը այդ հողատարածքը տվել է այլ նպատակով օգտագործման՝ կապի օպերատորին։

«Մխիթար Զաքարյանը համայնքապետ ընտրվելուց հետո 20 անգամ բարձրացրել է վարձավճարը, որպեսզի համայնքի բյուջե գումար գա: Իսկ Դատախազությունը և Քննչական մարմինը մեղադրանք են առաջադրել Մխիթար Զաքարյանին, որ պարտավոր էր դադարեցնել հողօգտագործումը, որովհետև նպատակային չէր դա օգտագործվում, իսկ քանի որ չի դադարեցրել, պետությանը վնաս է հասցրել»,-ասաց Արծվիկ Մինասյանը:

Աղբյուր` Փաստինֆո