Փաստ ինֆո

Լրագրողների համար ապահովվելու է հնարավորություն, որ ստիպված չլինեն քայլել պատգամավորի հետևից, որն իրենց հարցերին չի պատասխանում։ Լրագրողների հետ զրույցի ժամանակ այս մասին ասաց ԱԺ «Քաղաքացիական պայմանագիր» խմբակցության պատգամավոր Ալեն Սիմոնյանը՝ անդրադառնալով լրագրողներին առնչվող սահմանափակումներին։

Ալեն Սիմոնյանի խոսքով ստեղծվելու է համակարգ, որը պաշտոնյաներին բերելու է լրագրողների մոտ, որ լրագրողների աշխատանքը համակարգված լինի։

«Որևիցե մեկին հաճելի չէ, որ պատգամավորը կամ պաշտոնյան քայլում է, օպերատորները մեծ շտատիվներով վազում են, լրագրողները հարց են տալիս։ Այլ տարբերակ կա։ Հանձնաժողովների նիստերի ժամանակ լինում է, որ հյուրեր են գալիս, որոնք չեն խոսում, հիմա համակարգ է ներդրվում, որը միանգամից չի գործելու։ Որոշ ժամանակ անց ունենալու եք այդ հնարավորությունը, պատգամավորները և պաշտոնյաները, որոնք կայցելեն ԱԺ, կմոտենան հատուկ վայրում և ճեպազրույցով հանդես կգան։ Մեր խմբակցությունը պարտավորվում է, որ ապահովի նման հնարավորություն լրագրողների համար»,-ասաց Ալեն Սիմոնյանը։

Դիտարկմանը, որ պատգամավորների մեծամասնությունը խուսափում է պատասխանել լրագրողների հարցերին, Ալեն Սիմոնյանն ասաց, որ խմբակցությունը կունենա մամուլի պատասխանատու, որի պարտականությունը կլինի ապահովել իշխող խմբի ներկայացուցիչների հետ ճեպազրույցներ։

Աղբյուր` Փաստինֆո