Փաստ ինֆո

Վերաքննիչ քրեական դատարանում՝ դատավոր Մհեր Արղամանյանի նախագահությամբ, այսօր կայացել է ԲԴԽ նախագահ (լիազորությունները կասեցված են) Ռուբեն Վարդազարյանի իրավունքների և օրինական շահերի խախտումը վերացնելուն պարտավորեցնելու վերաբերյալ դատարանի որոշման դեմ բողոքի գործով դատական նիստը։

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Դավիթ Հարությունյանի նախագահությամբ, բավարարել է Ռուբեն Վարդազարյանին որպես մեղադրյալ ներգրավելու մասին որոշման դեմ բողոքը՝ պարտավորեցնելով վերացնել Ռուբեն Վարդազարյանի իրավունքների և օրինական շահերի խախտումը։ Այլ խոսքով՝ դատարանն արձանագրել է, որ վարույթ իրականացնող մարմինը պարտավոր էր հաղթահարել Ռուբեն Վարդազարյանի գործառութային անձեռնմխելիությունը, ինչը չի կատարվել։ Դատախազությունը դատարանի որոշման դեմ վերաքննիչ բողոք է ներկայացրել, որը մակագրվել է դատավոր Մհեր Արղամանյանին։

Փաստաբան Հովհաննես Խուդոյանը «Փաստինֆո»-ի հետ զրույցում հայտնեց, որ այսօր կայացած դատական նիստի ընթացքում դատավոր Մհեր Արղամանյանին ինքնաբացարկ հայտնելու միջնորդություն են ներկայացրել դատարան։

Խնդիրն այն է, որ Ռուբեն Վարդազարյանի գործով դատախազության ներկայացրած բողոքը մակագրվել է ոչ թե գործերի բաշխման էլեկտրոնային համակարգի միջոցով, այլ՝ Վերաքննիչ քրեական դատարանի նախագահ Տիգրան Սահակյանի կողմից՝ վերջինիս հայեցողությամբ, ինչը պաշտպանության կողմի մոտ կասկածներ է առաջացրել՝ մակագրման ընթացքում օրենքով սահմանված կարգերի պահպանման, դատարանի անաչառության վերաբերյալ։

Նշենք, որ գործերի բաշխման համակարգը շուրջ 10 օր է չի աշխատում, իսկ մասնագիտական հանրությունը մտահոգություն է հայտնում առ այն, որ դատարաններում իրականացված քննչական գործողությունները, համակարգիչների առգրավումը դիտավորությամբ է իրականացվել՝ քաղաքական զգայունություն ունեցող քրեական գործերով իշխանության համար ցանկալի դատավորներին մակագրելու և ցանկալի որոշումներ ստանալու համար։

Բացի այդ՝ պարզվում է, որ պաշտպանության կողմը նաև խնդրել էր գործերի ձեռքով մակագրման վիճակագրություն տրամադրել, որը սակայն մերժվել է։ Այդ հանգամանքը ևս դրվել է ինքնաբացարկի միջնորդության հիմքում։

Ի դեպ, կարող ենք արձանագրել, որ դատավորներին ինքնաբացարկ հայտնելու միջնորդություններում վերջին օրերին հիմնականում որպես հիմք է նշվում դատարանների նախագահների կողմից գործերի բաշխման հանգամանքը։

Հիշեցնենք, որ ՀՀ ԲԴԽ նախագահ Ռուբեն Վարդազարյանին ՀՔԾ-ում մեղադրանք է առաջադրվել՝ ՀՀ քրեական օրենսգրքի 332-րդ հոդվածի 3-րդ մասի՝ պաշտոնեական դիրքն օգտագործելով արդարադատության իրականացմանը խոչընդոտելու հատկանիշներով, նրա նկատմամբ որպես խափանման միջոց է կիրառվել ստորագրությունը՝ չհեռանալու մասին։ Վարդազարյանի դեմ քրեական գործ է հարուցվել՝ առանց նրա անձեռնմխելիության հաղթահարման՝ նախկին դատավոր, ԱԱԾ տնօրենի նորանշանակ տեղակալ Անդրանիկ Սիմոնյանի հաղորդման հիման վրա։

Նկատենք, որ թեև ՀՀ գլխավոր դատախազությունը հայտարարել էր, թե Ռուբեն Վարդազարյանի գործառութային անձեռնմխելիության հաղթահարման խնդիր չկար, քանի որ քրեական հետապնդումը չի վերաբերում դատավորի կողմից իր լիազորությունների իրականացմանը։

Անգամ նախկին զինդատախազ Գագիկ Ջհանգիրյանի հանձնարարությամբ պատրաստված ԲԴԽ հաղորդագրության մեջ նշվել էր, թե Ռուբեն Վարդազարյանի նկատմամբ քրեական հետապնդումն իրականացվում է ոչ իր լիազորությունների իրականացման կապակցությամբ, սակայն փաստն այն է, որ քրեական գործը հարուցվել է պաշտոնեական դիրքի օգտագործմամբ արդարադատության իրականացմանը խոչընդոտելու հատկանիշներով։

Ռուբեն Վարդազարյանի նկատմամբ քրեական հետապնդում իրականացնելու որոշման դեմ երկու բողոք է ներկայացվել, որոնցից մեկով վիճարկվում էր քրեական գործի հարուցումը, մյուս բողոքով՝ Վարդազարյանին որպես մեղադրյալ ներգրավելու մասին որոշումը։ Երկու բողոքներով էլ բարձրացվել է գործառութային անձեռնմխելիության հաղթահարման անհրաժեշտությունը։ Փաստաբանի դիտարկմամբ՝ Ռուբեն Վարդազարյանի նկատմամբ ապօրինի հետապնդում է իրականացվել, վարույթն անթույլատրելի էր ի սկզբանե, ինչը հաստատվել է նաեւ դատարանի որոշմամբ։

Հեղինակ՝ Իզաբել Սահակյան

Աղբյուր` Փաստինֆո