Փաստ ինֆո

Իսրայելի վարչապետ Նաֆթալի Բենեթը Թեհրանին մեղադրել է Արաբական ծովում Mercer Street ճապոնական լցանավի վրա հարձակման համար պատասխանատվությունից խուսափելու մեջ: Համապատասխան հայտարարությունը վարչապետը արել է կիրակի օրը՝ հրեական պետության կառավարության ամենշաբաթյա նիստում, փոխանցում է ՏԱՍՍ-ը:

«Ես լսել եմ, որ Իրանը վախկոտ կերպով փորձում է խուսափել այդ իրադարձության համար պատասխանատվությունից։ Թեհրանը հերքում է տանկերի վրա հարձակմանը մասնակցությունը։ Դրա համար ես հարյուր տոկոսանոց վստահությամբ եզրակացնում եմ, որ Իրանը հարձակում է իրականացրել նավի վրա։ Դրա ապացույցները կան, եւ մենք ակնկալում ենք, որ միջազգային հանրությունը պարզորոշ կհասկացնի իրանական վարչակարգին, որ նրանք լուրջ սխալ են թույլ տվել», - տարածել է Իսրայելի վարչապետի հայտարարությունը նրա դիվանատունը:

«Աշխարհը հիշեցում է ստացել Իրանի ագրեսիայի մասին, այս անգամ բաց ծովում։ Իրանցիները, որոնք անօդաչու թռչող սարքերի օգնությամբ հարձակվել են Mercer Street նավի վրա, մտադիր էին հարված հասցնել իսրայելական թիրախին: Դրա փոխարեն նրանց ծովահենության գործողությունը հանգեցրել է Մեծ Բրիտանիայի եւ Ռումինիայի քաղաքացիների մահվան», - շարունակել է Բենեթը։ «Իրանի ավազակային ագրեսիան վտանգավոր է ոչ միայն Իսրայելի համար, այլեւ վնաս է հասցնում գլոբալ շահերին, այն է՝ նավագնացության ազատությանն ու միջազգային առեւտրին», - հավելել է Բենեթը՝ նշելով, որ Իսրայելը «գիտի, թե ինչպես յուրովի փոխանցել ուղերձն Իրանին»:

Աղբյուր` Փաստինֆո