Փաստ ինֆո

Նման եղանակով, արագ-արագ, մեկ օրում առանց հանրային քննարկման նախագիծն ընդունելը ծածկադմբոց է, դա չի սազում այս իշխանությանը, հիասթափեցնող է,- «Փաստինֆո»-ի հետ զրույցում ասել է փաստաբան, միջազգային իրավունքի մասնագետ Արա Ղազարյանը՝ անդրադառնալով լուծարված 7-րդ գումարման ԱԺ-ի կողմից նախօրեին արտահերթ նիստ հրավիրելու եւ հայհոյանքը քրեականացնող օրինագծի ընդունմանը։

Փորձագետի դիտարկմամբ՝ առհասարակ անհրաժեշտ չէ հայհոյանքը քրեականացնել, քանի որ անորոշ է՝ ի՞նչ է հայհոյանքը:

«Որոշ դեպքերում նույնիսկ կարող է անհրաժեշտ լինել հայհոյանքը պաշտպանել, այլ կերպ ասած՝ վուլգար խոսքը, դա միջազգային սկզբունք է: Պետք է ոչ թե ի սկզբանե արգելել, այլ՝ թողնել, որ նա գոյություն ունենա և կոնկրետ իրավիճակներում որոշել արգելել և որքան արգելել: Նույնիսկ հայհոյախառն արտահայտությունը կարող է իր մեջ պարունակել ինֆորմացիոն արժեք» ,- Արա Ղազարյանը՝ արձանագրելով օրենքը վտանգում է ազատ խոսքը:

Նախագծով առաջարկվում է անձին հայհոյելը կամ արժանապատվությունը վիրավորելը պատժել տուգանքով` նվազագույն աշխատավարձի հարյուրապատիկից հինգհարյուրապատիկի չափով: Եթե նույն արարքը միևնույն անձի նկատմամբ պարբերաբար է կատարվել, պատժվում է տուգանքով` 1-3 միլիոն դրամով կամ կալանքով՝ մեկից երեք ամիս ժամկետով:

Փորձագետ Արա Ղազարյանը մեզ հետ զրույցում պարզաբանեց, որ օրենքը տարածվելու է բոլորի վրա, քանի օր Քրեական իրավունքը բոլորի վրա տարածվում է, պարզապես կան ծանրացնող հանգամանքներ կան, եթե, օրինակ, հանրային գործառույթ իրականացնող անձի դեմ է:

Հարցին՝ ինչպե՞ս է տարանջատվելու տվյալ արտահայտությունը հայհոյա՞նք է, թե՝ գնահատողական արտահայտություն, փորձագետն ասաց՝ անորոշ է.

«Որքան հասկանում եմ, անձը նույն գործով կարող է դիմել և՛ քաղաքացիական իրավունքի պաշտպանության մեխանիզմով՝ այսինքն՝ քաղաքացիական դատարան և՛ քրեական, այսինք՝ դատախազին: Որոշ դեպքերում ինքը կարող է իր դատախազը հանդիսանալ, այսինքն՝ անկախ դատախազի ցանկությունից մասնավոր մեղադրանքի ուժով դիմի դատարան: Սա կլինի հաջորդ տարի մյուս տարի, երբ նոր օրենսգիրքն ուժի մեջ մտնի: Դժվար է հստակորեն դրանք տարանջատել, դրա համար էլ ի սկզբանե պետք էր ոչ թե սահմանել, այլ՝ թույլ տալ, որ կոնկրետ գործերով սահմանվի, ինչպես մինչ հիմա է արվել»:

Դիտարկմանը՝ երբ օրինակ հայհոյանք հնչի իշխանության, այլ ոչ թե կոնկրետ ներկայացուցչի հասցեին, կարո՞ղ է իշխանությունը հանդես գալ որպես տուժող, Արա Ղազարյանը պարզաբանեց.

«Քրեական իրավունքում իշխանությունը չի կարող որպես տուժող հանդես գալ, տուժող հանդես է գալիս կոնկրետ անձը:

Դրա համար էլ ժամանակին առաջարկվում էր վարչաիրավական տիրույթը, եթե անձն ինչ-որ հայհոյանք է տալիս, որոշ հանգամանքների ներքո դա կարող է խուլիգանություն համարվել, բայց այս օրենսգրքով՝ ոչ»:

Աղբյուր` Փաստինֆո