Փաստ ինֆո

Կառավարության վերջին նիստը հաջորդել էր հայ-ադրբեջանական սահմանի՝ Սոթքից մինչև Վերին Շորժա հատվածում ադրբեջանական զինված ուժերի հերթական սադրանքին և հրադադարի խախտմանը, որի հետևանքով հայկական կողմից երեք զինծառայող զոհվեց, ևս 2-ը վիրավորում ստացան։

Ի զարմանս շատերի՝ կառավարության նիստում օրակարգից դուրս՝ իմիջիայլոց անդրադարձ եղավ այս թեմային։ Եվ վերջ։ Նիստի սցենարը նախապես էր գրված և կրթության ու առողջապահության ոլորտների՝ արագի մեջ զեկույցներից հետո կառավարության ֆինանսատնտեսական բլոկը՝ վարչապետի պաշտոնակատարի առաջարկով անցավ բուն թեմային, 36 օրակարգային հարցերի մեջ՝ զեկուցվող 3 հարցերից կարևորին՝ որն էր՝ կա-զի-նոն։

Խնդրո առարկա հարցի քննարկմանն էր նվիրված նիստի առյուծի բաժինը։ Երևի անհնար էր սա նույնպես խցկել չզեկուցվող հարցերի մեջ, կամ՝ ընդհանրապես, միանգամից չեղարկել կառավարության բաց նիստերը՝ վարագույրը բացելով միայն այն ժամանակ, երբ ՔՊ առաջնորդը քաղաքական հայտարարություններ ունի անելու։ Բայց վերադառնանք բուն խնդրին։

Ակնհայտ էր, որ խնդրո առարկա՝ «կազինո և մոլախաղեր»՝ թեմայի սցենարը նախապես էր գրվել։ Այն նախ՝ բացում է էկոնոմիկայի՝ խելքից ու մտքից դուրս՝ արկածային սյուժեների սիրահար նախարարը՝ ներկայացնելով այն որպես Արագածոտնի Ապարան համայնքի տարածքում լեռնադահուկային համալիրի, ճոպանուղիների կառուցման ծրագիր, որն աստիճանաբար վերաճում է կազինոյի, որի դռները լայնորեն բացվելու են ՌԴ և Իրանից եկող՝ մոլախաղացների համար, ի հավելումն՝ Պակիստանը, ուր արգելված են կազինոները։ Եվրոպա անվան տակ, նախարարը նկատի ուներ նաև Թուրքիան, քանի որ Բադենից դժվար թե գան Ապարանի կողմերը։ Թերևս նաև՝ Կիպրոսը և Իռլանդիան, ուր ևս արգելված են մոլախաղերը․․․

Քերոբյանը՝ ներդրումային հերթական բումի և նոր քաղաքներ կառուցելու համատեքստում կանաչ ճանապարհ տալով կազինոյին՝ գնդակը պաս է տալիս ֆինանսների՝ զգուշավորության քարոզիչ նախարարին, որը սովորաբար կիսատոներով՝ բժշկական դիմակի միջից որոշակի նախազգուշական քայլերից հետո հաստատում է հարցը, նաև՝ միջանկյալ կարևորում նման ներդրումների դեպքում՝ պետական աջակցության անհրաժեշտությունն ու կարևորությունը, ձևակերպում՝ կազինոյի կարիքը և պահանջը։ հետո՝ հարցն անցնում է ոլորտային պատասխանատու՝ փոխվարչապետի՝ անտարակույս, էկոնոմիկայի նախարարին պաշտպանող «դաբրոյով», պետական աջակցության բացահայտմամբ, որն է՝ կազինոյի և մոլախաղերի օտարերկրյա սիրահարների համար ենթակառուցվածքների, ավտոկայանատեղերի և այլնի ստեղծումը /սպասարկող երկրի ճակատագիր/, ապա՝ թեման հանգրվանում է գլխավոր աթոռին բազմածի մոտ՝ նրա, ում մուտքը հոտընկայս ծափերով է ողջունվում պողպատե մանդատից հետո․․․ Իհարկե, նա արդեն հասցրել էր երկու բառ ասել առ այն, որ ինքը խաղատնային բիզնեսի ջատագով չէ, բայց դե, կան մարդիկ, որ ունեն պատշաճ միջոցներ և իրենց նման ժամանց թույլ են տալիս։

Ինչպես ասում են՝ երբեք մի ասա՝ երբեք։

Այս սցենարի կամ սյուժեի կոնֆլիկտը ներսում չէ, դրսում է, ներսում բոլորը համամիտ էին և մի պտույտ էլ նույն՝ «դաբրոյի» մոտիվներով կատարեցին։

Բայց թեմայի գագաթնակետը․․․ կուլմինացիան, բռնվեք՝ չընկնեք՝ դեռ պիտի հնչեր վարչապետի պաշտոնակատարի բերանով՝ մասնավորաբար, որ կան երկու ներդրողներ, որոնք սաստիկ ցանկանում են Երևան քաղաքում 80 միլիոնի ներդրումով խաղատների բացման ծրագիր իրականացնել։ Սոդոմգոմորական ախտաբանություն՝ երևանյան կազինոներ՝ բյուջեն լցնելու համա՞ր․․․ (Նկատենք, որ Երևանում խաղատների գոյությունն օրենքով արգելված էր 2010 թվականից․․․)

․․․Եվ պատերազմի մեջ գտնվող ՀՀ կառավարությունը, որը հազարումի հարց ունի լուծելու՝ լծվեց ամենահրատապ, առաջնահերթ հարցի լուծմանը՝ ինչո՞վ և ինչու՞մ է կայանալու ՀՀ կառավարության աջակցությունը՝ այս հույժ կարևոր ներդրումը կատարողներին․․․

Նրանց արտոնություններ տալն է ա՛յս կառավարության համար օրախնդիրը․․․

Սա աղետ է․․․

Աղբյուր` Փաստինֆո