Փաստ ինֆո

Բավական է, որ այսօր որևէ անձի նկատմամբ այս ընտրությունների վերաբերյալ որևէ գործընթաց լինի, անմիջապես հարուցվում է քրեական գործ, իսկ այս դեպքում, երբ հայրենիքի ճակատագրի և 5000 զինվորի հետ է կապված, քրեական գործ չի հարուցվում։ Այս մասին դատական նիստի ընթացքում ասաց փաստաբան, նախկին դատախազ Հակոբ Մարտիրոսյանը՝ դիմելով դատախազներին։

Ինչպես արդեն տեղեկացրել ենք՝ Հակոբ Մարտիրոսյանը և ՀՅԴ ԳՄ անդամ Արծվիկ Մինասյանը դեռևս հունիս ամսին հանցագործության մասին հաղորդում են ներկայացրել՝ պահանջելով քրեական գործ հարուցել Նիկոլ Փաշինյանի կողմից կատարված առերևույթ պետական դավաճանության փաստի առթիվ։ Ներկայացված հանցագործության մասին հաղորդմամբ Հակոբ Մարտիրոսյանը ներկայացրել է փաստական հանգամանքներ, որոնք առերևույթ վկայում են Նիկոլ Փաշինյանի կողմից թշնամի պետությանն օգուտ տալու մասին՝ ի վնաս ՀՀ-ի։

Ներկայացված հանցագործության մասին հաղորդումն առանձին քննության առարկա չի դարձվել, մասնավորապես, դատախազությունը հաղորդումը «մասնատել» է և մի մասով ուղարկել է ԱԱԾ քննչական դեպարտամենտ՝ Շուշիի անկման և Արցախի հարավային ուղղությամբ կատարված իրադարձությունների վերաբերյալ քրեական գործի, իսկ մի մասով՝ ՀՀ ՀՔԾ-ում քննվող՝ Մովսես Հակոբյանի կողմից ասուլիսում արված հայտարարությունների առթիվ հարուցված քրեական գործի շրջանակներում։ Դատախազության կողմից հաղորդմանը պատշաճ կարգով ընթացք չտալու հանգամանքը դիտարկվել է որպես անգործություն և դատախազության անգործության դեմ փաստաբանը բողոք է ներկայացրել դատարան։

«Փաստինֆո»-ի հաղորդմամբ՝ Երևանի ընդհանուր իրավասության դատարանում՝ դատավոր Կարեն Ֆարխոյանի նախագահությամբ, կայացած դատական նիստի ընթացքում փաստաբան Հակոբ Մարտիրոսյանը, ներկայացնելով բողոքի հիմքերն ընդգծեց, որ գլխավոր դատախազը ցուցաբերել է անգործություն, ինչի արդյունքում իր և Արծվիկ Մինասյանի օրինական շահը խախտվել է։

Մարտիրոսյանն ընդգծեց՝ ինչու՞ դատախազը չի հանձնարարում հարուցել քրեական գործ կամ չի հարուցում այն դեպքում, երբ այս ընտրությունների վերաբերյալ անմիջապես հարուցվում են քրեական գործեր, մինչդեռ, այս դեպքում գործ ունենք 5000 զինվորի կյանքի և հայրենիքի ճակատագրի հետ։

«Ամեն շաբաթ գնում եմ Եռաբլուր։ Ամեն շաբաթ գնում եմ մեռնում, վերակենդանանում ու նորից գալիս։ Նա, ով Եռաբլուր գնար գոնե երկու անգամ, անպայման քրեական գործ հարուցած կլիներ։ Հնարավոր չէ դիմակայել, դիմանալ այնտեղ ամփոփված հոգիների կանչին, որն իմ ականջին հնչում է որպես վրեժ թշնամուց, իսկ թե ով է թշնամին՝ չգիտեմ։ Առ այսօր մենք չգիտենք, թե ով է մեր պետական դավաճանություն կատարող ենթադրյալ սուբյեկտը»,- նշեց Մարտիրոսյանը՝ հավելելով, որ դեռ ինչքա՞ն պետք է ննջենք ու քնենք, ինչքան պետք է լռենք։

Նա ընդգծեց, որ ինքը, լինելով թոշակառու դատախազ, պատրաստ է եղել գնալ՝ անկախ այն հանգամանքներից, թե ապարատն ինչ միջոցներ կձեռնարկի իմ նկատմամբ։

«Քանի բացահայտված չէ, ես իմ ապրելը համարում եմ ոչ ճիշտ։ Այդ երիտասարդների փոխարեն ես պետք է զոհված լինեի»,- նշեց Մարտիրոսյանը։

Դատական նիստի ընթացքում նախկին դատախազը դիմեց երիտասարդ դատախազ գործընկերներին՝ մեջբերելով հայտնի խոսքերը. «Կացինդ սրելուց առաջ՝ գեթ մեկ անգամ քեզ ծառ զգա»։ Նա պարզաբանեց, որ թող վերջիններիս ընտանիքի անդամներից որևէ մեկի հետ որևէ բան չլինի, բայց արդյո՞ք նրանք կվարվեին նույնկերպ, եթե նրանք էլ պատերազմում զոհեր ունենային։

«Հիշե՛ք, հարգելի դատախազներ, գալու է մի օր, երբ դուք ձեր խղճի առաջ եք պատասխան տալու։ Իրացրեք ձեր դատավարական լիազորությունները՝ քրեական գործ հարուցեք։ Ամեն օր 10-15 քրեական գործ եք հարուցում, այս զինվորների կյանքն այդքան էժանագի՞ն եք համարում, որ քրեական գործ չեք հարուցում։ Ես գիտեմ, թե դուք որքան անզոր եք, բայց ձեր կամքը կարող եք դրսևորել և հարուցել քրեական գործ»,- նշեց Մարտիրոսյանը՝ դիմելով դատարանի դահլիճում գտնվող դատախազներին։

Ներկայացնելով դատարան ներկայացված բողոքի հիմքերը՝ Մարտիրոսյանը խնդրեց դատարանին բավարարել բողոքը, կայացնել որոշում՝ դիմող Արծվիկ Մինասյանի և Հակոբ Մարտիրոսյանի իրավունքների և ազատությունների խախտումները վերացնելու վարույթն իրականացնող պարտավորությունների մասին։

«Նման որոշում կայացնելով՝ Դուք, հարգելի՛ դատարան, հնարավորություն կընձեռեք զոհված 5000 հայորդիների և 11000-ից ավելի վիրավորների, նրանց կյանքի համար մեղավորների բացահայտման հարցում, պարզելու այս հանգամանքները և հայ ժողովուրը կիմանա, թե ով է մեր որդիների, զավակների մահվան պատասխանատուն, ում մեղքով նրանք զոհվեցին»,- եզրափակեց Հակոբ Մարտիրոսյանը։

Դատարանը որոշեց հետաձգել դատական նիստը՝ պայմանավորված մեկ այլ քրեական գործով անհապաղ քննության ենթակա խափանման միջոցի հարցի քննարկմամբ։ Հաջորդ դատական նիստը նշանակվել է օգոստոսի 30-ին, ժամը՝ 16.30-ին։

Հեղինակ՝ Իզաբել Սահակյան

Աղբյուր` Փաստինֆո