Փաստ ինֆո

Ադրբեջանը փորձում է, սահմանային տարբեր հատվածներում կտրուկ լարվածություն մտցնելով, ճնշումներ գործադրել ՀՀ իշխանությունների վրա, որպեսզի այս պահին օրակարգում գտնվող փաստաթղթի շուրջ իրենց համար ցանկալի արդյունքի հասնեն: «Փաստինֆո»-ի հետ զրույցում ասաց «Պատիվ ունեմ» դաշինքի անդամ, ռազմական փորձագետ Տիգրան Աբրահամյանը:

Իսկ թե ի՞նչ պայմանագրի մասին է խոսքը՝ զրուցակիցը պարզաբանեց՝ օրակարգում խաղաղության պայմանագիրն է.

«Ենթադրելի է, որ դա է օրակարգում՝ իր տարբեր բաղադրիչներով»,-ասաց փորձագետը:

Նշենք, որ Կառավարության այսօրվա նիստի ժամանակ Նիկոլ Փաշինյանն արձանագրեց, որ հայ-ադրբեջանական սահմանին իրավիճակը չի կայունանում և Ադրբեջանը շարունակում է իր ագրեսիվ հռետորաբանությունը՝ միևնույն ժամանակ հայտարարելով, թե տարածաշրջանի բոլոր կոմունիկացիաները պետք է բացվեն և Ադրբեջանը Հայաստանի տարածքով պիտի հաղորդակցություն ունենա դեպի Նախիջևան, Վրաստան, Իրան:

Փորձագետի խոսքով՝ Հայաստանն այս դեպքում շահող կողմ չի հանդիսանալու, ուստի Փաշինյանի հայտարարություններն իր համար անհասկանալի են.

«Հայաստանը պատրաստ չէ այդպիսի գործընթացի մեջ մտնելուն: Այս պարագայում Հայաստանը որպես շահող կողմ հանդես չի գալու: Ինձ համար անհասկանալի է Նիկոլ Փաշինյանի այդչափ լավատեսությունը և վստահությունը, բայց ես մեծ թվով սպառնալիքներ եմ տեսնում»,-ասաց Աբրահամյանը:

Անդրադառնալով Նիկոլ Փաշինյանի մեկ այլ հայտարարությանը, որ պետք է դիտարկել հայ-ադրբեջանական սահմանի ողջ երկայնքով ռուս սահմանապահների հենակետերի տեղակայման հարցը, փորձագետն արձանագրեց, սա վկայում է այն մասին, Հայաստանի իշխանությունները ի վիճակի չեն ապահովել Հայաստանի և հայ ժողովրդի անվտանգությունը.

«Նիկոլ Փաշինյանը խոստովանում է, որ ցանկություն չունի ապահովել Հայաստանի Հանրապետության և ՀՀ քաղաքացների անվտանգությունը: Նա փորձում է այդ գործառույթը վերապահել ՌԴ-ին: Սա խոսում է Հայաստանում առկա խորը ճգնաժամի, ՀՀ իշխանությունների այս և մի շարք այլ ուղղություններով որևէ քայլ չանելու փաստը»,-ասաց փորձագետը:

Աղբյուր` Փաստինֆո