Փաստ ինֆո

Կառավարությունը հավանություն տվեց «Մայլեռ Մաունթայն Ռեզորթ» ՓԲԸ-ի ներդրումային ծրագրին։ Էկոնոմիկայի նախարարի պաշտոնակատար Վահան Քերոբյանը հայտնեց, որ ընկերությունը Արագածոտնի մարզի Ապարան համայնքի 2080 հեկտար հողամասում լեռնադահուկային համալիր է կառուցելու, որտեղ կլինեն նաև զվարճանքի, ժամացի վայրեր։ Ըստ ծրագրի՝ պլանավորվում է ամենաքիչը 30 մլրդ դրամ ներդնել։ 15 մլրդ դրամը կներդնի ընկերությունը, ևս 15-ը կներգրավի այլ մասնավոր ընկերությունների կողմից։

Կառուցման ընթացքում ներգրավված կլինեն շինարարության ոլորտի շուրջ 250 աշխատող, իսկ ծրագիրն իրականացնելուց հետո կստեղծվի շուրջ 1500 մշտական աշխատատեղ։ Համալիրը տարեկան 500 հազար զբոսաշրջիկի կսպասարկի։ Համալիրը կունենա նաև խաղատուն։ Քերոբյանը նշեց` համալիրի ստեղծմամբ տուրիստական հոսքերը Ռուսաստանից, Իրանից և Եվրոպայից կավելանան, իսկ Հայաստանի ՀՆԱ–ն 0.2 տոկոսով կաճի։

Ֆինանսների նախարարի պաշտոնակատար Ատոմ Ջանջուղազյանը նկատեց՝ ըստ էության ներդրումը ենթադրում է պետական աջակցություն, ուշադրություն հրավիրեց կարևոր փաստի վրա.

«Ըստ էության, առաջարկվող տարբերակով ենթադրվում է, որ այնտեղ խաղատուն կառուցելու հնարավորություն կունենան և կկառուցվի ոչ այն քաղաքականության միասնական տրամաբանությամբ, որը կառավարությունը վարում է խաղային բնագավառի հետ կապված»։

Ջանջուղազյանը հիշեցրեց, որ այսօր չզեկուցվող փաթեթով քննարկել են օրինակ՝ ինտերնետում գովազների արգելքի մասին նախագիծը։

Վարչապետի պաշտոնակատարը նշեց, որ որևէ մեկին չեն կարող և չեն ուզում արգելել, որ գնա խաղատուն, բայց ուզում են նրա ճանապարհին որոշակի արգելակներ դնել ու չեն ցանկանում, որ հավելյալ միջոցներ լինեն, որ մարդուն կգայթակղի գնալ դեպի խաղատուն։

Փաշինյանը հիշեց Կապան այցը և կանանց բողոքները.

«Հիմնականում կանայք բողոքում են՝ ամուսիններն աշխատավարձի մի զգալի մաս թողնում են խաղակետերում, որոնք տեղակայված են անմիջապես բակում՝ շքամուտքի մոտ»։

Փոխվարչապետի պաշտոնակատար Ավինյանն էլ նշեց՝ հիմնական տրամաբանությունն այն է, որ լեռնադահուկային ծրագիրը Ծաղկաձորի հետ մրցակցային դաշտում լինի։

Քերոբյանը տեղեկացրեց, որ ցանկանում են օգնել ընկերությանը՝ ձեռք բերել հողատարածքներ, ընկերությունը մեծ մասը գնել է.

«Կա շրջակա միջավայրի հետ կապված խնդիր, որովհետև որոշակի ծառահատումներ պետք է լինեն, բայց ընկերությունը բազմակի անգամ ավելի մեծ ծառատնկման պարտավորություն է ստանձնել»։

«Եթե անկեղծ ասեմ՝ խաղատներով առանձնապես հետաքրքրված չեմ»,-հայտարարեց ՀՀ վարչապետի պաշտոնակատար Նիկոլ Փաշինյանը, իսկ կառավարության անդամներին կոչ արեց՝ քվեարկելուց առաջ մտածել.

«Ամեն որոշման հետ սենց սարսափի մթնոլորտ տարածել՝ «վայ, էս ինչ են անում, էս ինչ են կառուցում, թող ոչ մի բան չկառուցվի», էդ ճիշտ բան չի։ Իսկ ինչի՞ ամեն ինչ պետք ա կառավարությունը անի։ Հեսա կխորանանք ու կգանք այն եզրակացութան, որ հերթական ահասարսուռ դավադրությունն է տեղի ունենում Հայաստանի ու հայ ժողովրդի դեմ, հետևաբար, քվեարկությունից առաջ մտածեք՝ ինչի օգտին եք քվեարկում, որովհետև պատմությունը, հնարավոր է, ձեզ չների»,- արձագանքեց Փաշինյանը։

Աղբյուր` Փաստինֆո