Փաստ ինֆո

Գորիսի քաղաքապետ Առուշ Առուշանյանի գործով նախաքննության ավարտ է հայտարարվել։ Փաստաբան Էրիկ Ալեքսանյանը լրագրողների հետ զրույցում հայտարարեց, որ Առուշանյանի՝ այս պահի դրությամբ կալանքի տակ մնալն ուղղակի օրինական չի կարող համարվել։ 

«Մենք այն կարծիքին ենք, որ երբ նախաքննության ավարտ է հայտարարվել, քննությանը խոչընդոտելու հիմքը, որը նախկինում վարույթն իրականացնող մարմինը պնդում էր, թե առկա է Առաջին ատյանի դատարանի՝ կալանավորումը որպես խափանման միջոց ընտրելու վերաբերյալ որոշումը կայացնելու ժամանակ, այլեւս գոյություն չունի։ Եթե պայմանական ընդունենք, որ այդ հիմքը, ի սկզբանե- կար, ապա այս պահի դրությամբ՝ նախաքննության ավարտից հետո, այդ հիմքը առհասարակ գոյություն ունենալ չի կարող։

Փաստաբանը հավելեց, որ այս պահին Վերաքննիչ քրեական դատարանում ունեն արդեն նշանակված դատական նիստի օր՝ օգոստոսի երկուսին, որտեղ քննության է առնվելու փաստաբանների բողոքը՝ Առաջին ատյանի դատարանի որոշման դեմ։

«Բնականաբար, վերաքննիչ քրեական դատարանը՝ օրենսդրության համաձայն, պետք է գնահատի առաջին ատյանի դատարանի որոշումը այն նյութերի շրջանակներում, որոնք որ դատարանը որոշում է կայացրել։ Այս պահի դրությամբ նոր հանգամանք է, որ նախաքննության ավարտ է հայտարարվել և, ըստ էության, եվրոպական դատարանների չափանիշների համաձայն՝ քննությանը խոչընդոտելու հիմքը մեկ փուլի ավարտից հետո նվազում է։ Մենք այդ հանգամանքը կհայտնենք դատարանին։ Կարող եմ ասել, որ դատարանը հայտնելու է, որ վերջինս քննելու և գնահատելու է դատարանի որոշումը այն նյութերի շրջանակներում, որը առաջին ատյանի դատարանը կայացրել է, բայց գտնում եմ, որ թեև ունենք նոր հանգամանք, դատարանը այնուամենայնիվ, զուտ անձի ազատության իրավունքի բարձր արժեքից ելնելով և զուտ իրավունքի գերակայության տեսանկյունից այս հանգամանքին պետք է գնահատական արժանացնի»։

Նախաքնության ավարտից հետո քննիչը կտրամադրի ողջ նյութերը և ժամկետ կունենան՝ նյութերին ծանոթանալու համար։ Ավարտը հայտարարելուց հետո օգոստոսի երկուսին լսվելու է կալանքի իրավաչափության հարցը, թե ինչ որոշում կկայացվի՝ փաստաբանը կանխատեսում չունի, սակայն ունի ողջամիտ ենթադրություն։

«Կկայացվի նույն որոշումը, ինչը Մանվել Փարամազյանի դեպքում։ Այնուամենայնիվ, մեր դուխը տեղն է, պատրաստ ենք ներկայանալ դատական նիստին և պայքարել, թեև գիտակցում ենք, որ ձևական ընթացակարգ է»։

Ալեքսանյանը նշեց, որ դատավոր Մնացական Ալեքսանյանի մասին երկու կարծիք ունի՝ երկուսն էլ օբյեկտիվ են։ Առաջինը՝ դատավորը բավականին պատրաստված է, տեսական գիտելիքներ ունի, բայց նրա կամքը շատ թույլ է։

Ալեքսանյանը պնդում է՝ պայքարելու են ու եթե որևէ մեկը մտածում է, որ Առուշանյանի գետնին պառկեցնելով, կալանավորելով կկարողանան նրան, նրա դուխը և կամքը կոտրել՝ բոլորը սխալվում են։

Աղբյուր` Փաստինֆո