Փաստ ինֆո

«Ի հեճուկս ՀՀ կառավարության և միջազգային հանրության գործադրած ջանքերի, իրադրությունը հայ-ադրբեջանական սահմանագծի երկարությամբ չի կայունանում»,- այս մասին կառավարության նիստի ժամանակ հայտարարեց ՀՀ Վարչապետի պաշտոնակատար Նիկոլ Փաշինյանը։

«Ադրբեջանը շարունակում է ագրեսիվ հռետորաբանության և գործողությունների գործադրումը, միևնույն ժամանակ, անպատասխան թողնելով իրադրության քաղաքական և երկարաժամկետ կարգավորմանն ուղղված միջազգային հանրության բոլոր առաջարկները»։

Փաշինյանը հիշեցրեց ԵԱՀԿ ՄԽ համանախագահների՝ օրինակ ապրիլի 13-ի հայտարարությունը, որով կողմերին կոչ են անում առաջին իսկ հնարավորության դեպքում վերսկսել բարձր մակարդակի քաղաքական երկխոսությունը՝ համանախագահների հովանու ներքո։ Փաշինյանը հիշեցրեց, որ մինչև օրս Ադրբեջանը չի արձագանքել կոչին, մինչդեռ Հայաստանը բազմիցս ընդգծել է իր պատրաստակամությունը՝ ցանկացած պահի սկսելու բանակցային գործընթացը՝ առաջարկվող ֆորմատով։

«Մենք արտահայտել ենք նաև ԵԱՀԿ ՄԽ համանախագահության մանդատից դուրս գտնվող հարցերի վերաբերյալ երկխոսության մեջ գտնվելու մեր պատրաստակամությունը։ Այսուհանդերձ, Ադրբեջանն իր բոլոր գործողություններով փորձում է խափանել երկխոսության որևէ հնարավարություն՝ հռետորաբանությամբ և գործողություններով վարկաբեկելով նոյեմբերի 9-ի և հունվարի 11-ի եռակողմ հայտարարությունները»։

Փաշինյանը նշեց՝ Ադրբեջանում շարունակվում են հայ ռազմագերիների, պատանդների և այլ պահվող անձանց շինծու դատավարությունները, որի հետևանքով նրանք դատապարտվում են երկար տարիների ազատազրկումների։ Փաշինյանն ընդգծեց, որ վերջին շրջանում գրեթե բոլոր դատապարտվածները գերեվարվել են նոյեմբերի 9-ից հետո՝ խաղաղապահների պատասխանատվության գոտիներում։

«Եթե այս փաստը համադրում ենք այն լայնածավալ հակաքարոզչության հետ, որ Ադրբեջանում վարվում է ընդդեմ խաղաղապահների և այն փաստի հետ, որ Ադրբեջանը մինչև օրս չի ստորագրել խաղաղապահների մանդատը՝ ակնհայտ է դառնում, որ սա խաղաղապահների՝ այսինքն, ԼՂ-ում կայունության ու խաղաղության դեմ իրականացվող գործողությունների շարք է։

Աղբյուր` Փաստինֆո