Փաստ ինֆո

Մեղրիի նախկին համայնքապետ Մխիթար Զաքարյանը և Սիսիանի համայնքապետ Արթուր Սարգսյանը պետք է ազատ արձակվեն։ Այս հարցով փաստաբան, «Հայաստան» դաշինքի պատգամավոր Արամ Վարդևանյանը դիմել է դատախազություն՝ ներկայացնելով Մխիթար Զաքարյանի և Արթուր Սարգսյանի պատգամավորի վկայականների պատճեններ։ Արամ Վարդևանյանը «Փաստինֆո»-ի հետ զրույցում պարզաբանեց, որ Սահմանադրության 96-րդ հոդվածը պատգամավորի վերաբերյալ երաշխիքներ է նախատեսում, այդ թվում՝ անձնական անձեռնմխելիություն, ինչի վերաբերյալ ՍԴ որոշմամբ հետաքրքիր շեշտադրումներ կան։

«Պատգամավորն ունի անձնական անձեռնմխելիություն։ Անձնական անձեռնմխելիության հաղթահարումն իրականացվում է ԱԺ համաձայնությամբ»,- նշեց Արամ Վարդևանյանը՝ հիշեցնելով ՀՀ երկրորդ նախագահ Ռոբերտ Քոչարյանի և նախկին փոխվարչապետ, «Հայաստան» դաշինքի պատգամավոր Արմեն Գևորգյանի գործով հունիսի 29-ին կայացած դատական նիստը, որի ընթացքում գլխավոր դատախազի տեղակալ Գևորգ Բաղդասարյանը ևս ընդունել է, որ ԱԺ պատգամավորի՝ անձնական ազատության սահմանափակման համար անհրաժեշտ է ԱԺ համաձայնությունը։

«Այլ հարց է, որ իր կարծիքը, որը բնավ չեմ կիսում՝ քրեական հետապնդումը շարունակելու, ընդհատելու կամ նոր քրեական հետապնդում ձևակերպումների վերաբերյալ, դրա մասին ունեմ առանձին դիրքորոշում, բայց այժմ էականն այն է, որ առնվազն անձնական ազատության վերաբերյալ անհրաժեշտ է ԱԺ համաձայնություն։

Դատախազությունը Սահմանադրությամբ օժտված է քրեական գործի օրինականության հսկման լիազորությամբ, ինչն իրենից ենթադրում է նաև պարտականություն։ Օրինականությունն առնվազն երեկվանից սկսված խաթարվել է, որովհետև երեկ ԱԺ պատգամավորի վկայականներ են ստացել Մխիթար Զաքարյանը և Արթուր Սարգսյանը։ Այդ հանգամանքը ես երեկ երեկոյան փոխանցել եմ դատախազությանը, իրենք այդ հանգամանքով պետք է արդեն իսկ սահմանափակված լինեն»,- նշեց Վարդևանյանը՝ հավելելով, որ դա ենթադրում է անհապաղ գործողության իրականացում։

Հարցին՝ արդյոք բարձրացվել է նաև քրեական հետապնդումը դադարեցնելու հարցը, փաստաբանը նշեց, որ այս պահին միայն անձնական ազատության մասին բարձրացրել, դա անմիջականորեն գործող իրավունք է և դրա սահմանափակումը պետք է լինի բացառապես օրինական, ինչն այս դեպքում օրինական չէ՝ առնվազն երեկվանից հասանելի դարձած պատգամավորի վկայականների պայմաններում։

Հարցին՝ մանդատները կփոխանցվե՞ն այլ թեկնածուների, եթե դատախազությունը մերժի և խափանման միջոցներն այդպես էլ չփոխվի, Վարդևանյանը նշեց, որ այս պահին նման տարբերակ դիտարկելը տեղին չի համարում։

««Հայաստան» դաշինքի պատգամավորներ Մխիթար Զաքարյանը և Արթուր Սարգսյանը պետք է լինեն ազատության մեջ, քանի դեռ ԱԺ-ի կողմից հակառակի վերաբերյալ համաձայնություն չի տրվել։ Սա է Սահմանադրության պահանջը, սա է իրավունքի տրամաբանությունը։ Եթե դատախազությունը նույնիսկ այս հարցում դրսևորում է նման անգործություն, ես ի՞նչ կարող եմ ասել»,- նշեց նա։

Ինչ վերաբերում է ԿԸՀ-ի կողմից պատգամավորների թեկնածուի նկատմամբ հետապնդում իրականացնելու և նրանց ազատությունից զրկելուն համաձայնություն տալուն, Վարդևանյանը նշեց, որ պատգամավորի թեկնածուի կարգավիճակ ունեին արտահերթ խորհրդարանական ընտրություններին մասնակցող 25 ուժերի ցուցակներում ընդգրկված յուրաքանչյուր անձ, ընդհուպ՝ մինչև ՍԴ-ի կողմից վերջնական որոշումը և նույնիսկ ամենամեծ ցանկության դեպքում այդ կարգավիճակը և ԱԺ պատգամավորի մանդատ ստացած անձի կարգավիճակի հետ նույնացնելն անհնար է։

Հեղինակ՝ Իզաբել Սահակյան

Աղբյուր` Փաստինֆո