Փաստ ինֆո

Հայաստանի Հանրապետությունում անասնակերի վիճակը շատ վատ է։ Հիմնական պատճառը երաշտն է։ «Փաստինֆո»-ի հետ զրույցի ժամանակ այս մասին ասաց «Ագրարագյուղացիական միավորում» ՀԿ նախագահ Հրաչ Բերբերյանը։

Նրա փոխանցմամբ՝ պետական այրերն այդպես էլ չընդունեցին, որ երաշտ է։ Այն արոտավայրերը, որոնք թշնամու վերահսկողության տակ են անցել, այնտեղ գյուղացին բնականաբար ո՛չ խոտհարք կարող է անել, ո՛չ էլ արոտ կազմակերպել։

«Մեզ մոտ երաշտ է եղել և բնականաբար այդ խոտի զանգվածը չունենք, որ ձմռան համար կեր կուտակենք։ Հիմա փորձում ենք մեր միավորման ֆերմերների հետ Վրաստանից խոտ ներկրել, սակայն Հայաստանի մաքսայինը 1կգ-ի վրա 45 դրամ պետական տուրք է կիրառում։ Կարծում եմ՝ առնվազն խեղկատակություն է անասնակերի վրա պետտուրք կիրառելը։ Դա այն դեպքում, որ վտանգ ունենք շատ արագ գլխաքանակի անկում ունենալ»,-նշեց Հրաչ Բերբերյանը։

Նրա խոսքով հիմա արդեն մասսայական մորթ է իրականացվում, իսկ պետությունը խոչընդոտում է Հանրապետություն անասնակերի ներկրմանը։ Հրաչ Բերբերյանը նշեց, որ ֆերմերները 7000 կգ խոտ էին բերել Վրաստանից և պետտուրք էին կիրառել։

«Ստացվում է՝ խոտ չկա, դեռ մի բան էլ խոչընդոտում են, որ խոտ ներկրեն Հանրապետություն։ Թուրքի հետախուզությունը Հայաստանում լավ է աշխատում»,-ասաց Հրաչ Բերբերյանը։

Վերջինս ընդգծեց՝ մոտ 1-2 ամիս տեղումներ չենք ունեցել, և բնականաբար խոտը պետք է չորանար։ Եթե 28 օր տեղումներ չեն լինում, կառավարությունն իրավունք ունի երաշտ հայտարարել։

«Եթե երաշտ հայտարարած լինեինք, կարող էինք դիմել մեր բարեկամ երկրներին և բավականին անասնակեր ստանայինք որպես օգնություն, սակայն դա չենք արել։ Ընդունված է, որ տարբեր երկրների գյուղատնտեսության աշխատողները մեկը մյուսին օգնում են»,-ասաց Հրաչ Բերբերյանը՝ հավելելով, որ այժմ պետք է գոնե սահմանված պետտուրքը հանեն, որ մարդիկ կարողանան խոտ ներկրել Հայաստան։

Աղբյուր` Փաստինֆո