Փաստ ինֆո

«Անհնարին է մի ստեղծագործական խումբ ձուլել մի ուրիշին՝ աբսուրդ է». Հայաստանի թատերական գործիչների միության նախագահ, Հակոբ Պարոնյանի անվան երաժշտական կոմեդիայի պետական թատրոնի գեղարվեստական ղեկավար և գլխավոր ռեժիսոր Հակոբ Ղազանչյանը չի պատկերացնում երկու ստեղծագործական կառույցների՝ Պարոնյան թատրոնի և Պետական կամերային երաժշտական թատրոնի միավորումը:

«Միավորում չէ՝ իրենց միաձուլում են մեզ։ Ես կատեգորիկ դեմ եմ թատերական միավորի վերացմանը։ Եթե թատրոնի հանդեպ խնդիրներ կան, իրավունքն իրենցն է՝ թող փոխեն, էնպես անեն, որ թատրոնը ուրիշ կերպ աշխատի՝ կառուցվածքային փոփոխություն են անում, ինչ են անում, բայց թատերական միավորի կորուստ` ես երբեք դրան ոչ մի պարագայում չեմ կարող համաձայնություն տալ»։

Նախարարությունն առաջարկում է Սիրահարների այգում գտնվող Պետական կամերային երաժշտական թատրոնի շենքը հանձնել Պետական սիմֆոնիկ նվագախմբի տնօրինությանը: Ադպիսով՝ սիմֆոնիկ նվագախումբը կունենա կայուն, համակարգված և շարունակական փորձեր իրականացնելու հնարավորություն, ինչպես նաև կամերային համերգներ տալու հնարավորություն։

ԿԳՄՍՆ Մշակույթի ոլորտը համակարգող փոխնախարար Արա Խզմալյանը հայտնել էր, թե Կամերային երաժշտական թատրոնը իր հիմնական առաքելության և կանոնադրական խնդիրներով մոտ է այն առաքելության և խնդիրներին, որ ունի Պարոնյանի անվան երաժշտական կոմեդիայի թատրոնը, Ղազանչյանը պնդում է՝ այդպես չէ։

«Մոտ է, հեռու է՝ այդ հարցը նույնիսկ չեմ քննարկում։ Կարծում եմ, որ թատերական միավոր կորցնելը սխալ է։ Թատերական դահլիճ կորցնելը սխալ է՝ ընդ որում շատ լավ դահլիճ, հարմարավետ թատերական դահլիճ կորցնելը սխալ է։ Տարիներով այդտեղ ներդրումներ են արվել, դահլիճ է սարքվել, պետական փողեր են ներդրվել՝ հովացման և ջեռուցման համակարգ է սարքվել։ Էդ ամեն ինչը մտնեն կոտրեն, ջարդեն, թողնեն։ Ինքը թատերական դահլիճն է ափսոս։ Համապատասախանում է թե ոչ, թող կամ իրենք պրոֆիլը փոխեն, կամ այնպիսի հարթակ ստեղծեն, որ տեղով օրիգինալ լինի, բայց միավորը չպետք է վերանա»,- «Փաստինֆո»-ի հետ զրույցում ասել է Ղազանչյանը։

Ղազանչյանը վստահ է՝ Հայաստանի պետական սիմֆոնիկ նվագախմբի համար, որին էլ ուզում են տրամադրել թատրոնի Սիրահարների այգում գտնվող շենքը, տարածքը բոլորովին հարմար չէ:

«Այս ամենը արվում է, որպեսզի տրամադրվի պետական սիմֆոնիկ նվագախմբին։ Սիմֆոնիկ նվագախումբն էլ բազա է ստեղծելու՝ միայն փորձերի համար, բայց դա էլ չեմ պատկերացնում՝ էդ հսկայական կոլեկտիվը ինչպե՞ս է տեղավորվելու էդ մի փոքր տեղում դա էլ չեմ պատկերացնում։ Տեխնիկապես նաև դա հարմար չէ կոլեկտիվին, որի համար ուզում են էս ամեն ինչը անել»։

Հարցին՝ արդյոք նախարարությունը բյուջեի տրամադրման խնդիր ունի, Հակոբ Պարոնյանի անվան երաժշտական կոմեդիայի պետական թատրոնի գեղարվեստական ղեկավար և գլխավոր ռեժիսոր Հակոբ Ղազանչյանը վստահեցրեց, որ խնդիրը տարածք տրամադրելու մեջ է.

«Խնդիրն ըստ իրենց ասածի՝ բյուջեի հետ որևէ կապ չունի, որովհետև թատրոնի կոլեկտիվը միացնում են մեզ, թատրոնի ողջ բյուջեն խոստանում են տալ մեզ։ Սա բյուջեի խնդիր չէ, այլ տարածքի խնդիր»։

Իսկ թե ինչու նման որոշում կայացվեց հիմա՝ Ղազանչյանը նշեց, որ դրա մասին քննարկումները ծավալվում են արդեն մի քանի տարի։ Պետական սիմֆոնիկ նվագախմբի տեղի հարցը ևս մի քանի տարի է քննարկման փուլում է։

«Նվագախումբը մեզ պատիվ բերող է ՝ միջազգային ճանաչում ունեցող և պետք է հարցը լուծվի։ Բայց, ի վերջո, որոշվեց հարցն այսպես լուծել՝ դա սխալ է։ Կարծում եմ, որ հարցը պետք է լուծվի՝ չեմ կարծում, որ ուրիշ տարբերակ չկար»։

Հետագայի համար որոշումը չեղարկելու հույս ունեն արվեստագետները։ Թատրոնները միավորելու որոշման նախագիծ դեռևս չկա, Ղազանչյանը հույս է փայփայում, որ, այնուամենայնիվ, միավորում տեղի չի ունենա:

«Էդ հույսով ապրում ենք։ Այնպես չէ, որ հանգիստ նստած ապրում ենք։ Մենք էլ ենք բանակցություններ տանում և, այնուամենայնիվ, առայժմ հուսադրող միակ բանը այն է, որ առայժմ որոշման նախագիծը չի շրջանառվում, բանավոր խոսքերի հիման վրա է սա տեղի ունենում։ Հույս ունեմ, որ այլ տարբերակ կմտածվի՝ այս հարցը լուծելու համար»։

Աղբյուր` Փաստինֆո