Փաստ ինֆո

Հայ-ադրբեջանական սահմանի Երասխի հատվածում հակառակորդի ակտիվությունը պայմանավորում եմ մի քանի հանգամանքով՝ ՀՀ իշխանությունների անգործությամբ, նվաստացմամբ և պետական շահը պաշտպանել ի զորու չլինելով: «Փաստինֆո» -ի հետ զրույցում ասաց ՀՀԿ խոսնակ Էդուարդ Շարմազանովը:

Նրա դիտարկմամբ՝Ադրբեջանը, սահմանային լարվածություն ստեղծելով, փորձում է հնարավորինս շատ զիջումներ կորզել, ճնշում գործադրել ՀՀ իշխանությունների վրա և ստանալ իրենց համար ցանկալի դիրքեր և տարածքներ՝ Արարատի մարզում, Տավուշում, Սյունիքում և Գեղարքունիքում, ինչպես նաև հայկական մի շարք ռազմավարական, ստրատեգիական ճանապարհներ իրենց վերահսկողության տակ վերցնելով՝ Հայաստանն «աքցանի» մեջ պահել.

«Ադրբեջանը շատ լավ գիտակցում է, որ Հայաստանում կա իշխանություն, որը չի կարող ազգային շահը պաշտպանել և հնարավորինս փորձում է շատ ճնշում գործադրել, սրա մասին մենք բազմիցս զգուշացրել ենք, ասել ենք, որ Նիկոլ Փաշինյանի իշխանությանը մնալը հղի է նոր խնդիրներով»,-ասաց Շարմազանովը և ավելացրեց. «Չեմ բացառում, որ սա պայմանավորված փոքրիկ բախում էր, որի արդյունքում Հայաստանը կկորցնի տարածքներ, մեղքը կբարդվի ՌԴ-ի վրա, ինչն էլ առիթ կհանդիսանան ՀՀ իշխանությունների համար, որպեսզի փոխեն արտաքին քաղաքական վեկտորը՝ դեպի Արևմուտք, բայց դա իրականում չի լինելու դեպի Արևմուտք, Արևմուտքը Հայաստանի «բանալիները» տալու է Թուրքիային»:

Հիշեցնենք, որ Երասխում սահմանային միջադեպերին նախորդել էր Եվրոպական խորհրդի նախագահ Շառլ Միշելի այցը Հայաստան, որի ընթացքում Միշելը աջակցություն էր հայտնել Նիկոլ Փաշինյանին և հայտարարել 2,5 մլրդ Հայաստանին տրամադրելու հաստատակամության մասին:

Հարցին՝ թե Եվրոպական խորհրդի նախագահի այցի և սահմանային միջադեպերի միջև որևէ կապ տեսնո՞ւմ է, Շարմազանովն ասաց, որ եվրոպական գործիչների ակտիվացումը Հայաստանում նպատակ ունի Հայաստանը ռուսական ազդեցության գոտուց տեղափոխել Արևմուտք, բայց իրականում՝ թուրքական ազդեցության գոտի.

«Այնպես չէ, որ ես դեմ եմ հայ-եվրոպական հարաբերություններին, բայց պատմությունը ցույց է տվել՝ երբ Հայաստանը հեռացել է իր ռազմավարական դաշնակից Ռուսաստանից, ընկել է Թուրքիայի ճիրանները:
Եվրոպան ի՞նչ արեց 44-օրյա պատերազմի ընթացքում, որևէ բանաձև ընդունե՞ց ընդդեմ Ադրբեջանի, որևէ սանկցիա կիրառեց, ոչ՛ մի ծպտուն չի հանել, հիմա էլ ասում է, որ պատրաստ է աջակցել, ներդրումներ անել, բայց ներդրումը ո՞րն է, մեզ համար կարևորը մեր անվտանգությունն է:

Ու՞ր էր Եվրոպան, երբ Ադրբեջանը սպառնում էր Արցախի խաղաղ բնակիչներին, իրենց համար Նավալնին ավելի կարևոր էր, քան հազարավոր խաղաղ բնակիչների սպանություն: Հոկտեմբերի 19-ին ՌԴ նախագահն է առաջարկել կանգնեցնել պատերազմը, բայց Փաշինյանը չի համաձայնվել, կասկածներ ունեմ, որ չի համաձայնվել՝ պատերազմը կանգնեցնելու բոնուսներն Արևմուտքին տալու համար, բայց չի հաջողվել։

Ես դավադրությունների տեսությանը մեծ տեղ չեմ տալիս, բայց չեմ բացառում, որ այն ինչ տեղի է ունենում սահմանին, տեղի է ունենում պայմանավորված և Արևմուտքի լուռ համաձայնությամբ»,-ասաց նա և հավելեց՝ «այսօր Նիկոլ Փաշինյանը բոլոր արտաքին քաղաքական խաղացողներին ձեռնտու է, բացի՝ Հայաստանից, որովհետև այսօր բոլորը Հայաստանի հաշվին են իրենց աշխարհաքաղաքական շահը պաշտպանում»:

Աղբյուր` Փաստինֆո