Փաստ ինֆո

Սահմանին տիրող իրավիճակը Հայաստանի իշխանությունների պարտվողական քաղաքականության շարունակությունն է: «Փաստինֆո»-ի հետ զրույցում ասաց ՊՆ նախկին նախարար, գեներալ-գնդապետ Սեյրան Օհանյանը՝ անդրադառնալով հայ-ադրբեջանական սահմանի Երասխի հատվածում հակառակորդի ակտիվությանը:

Նրա դիտարկմամբ՝ հակառակորդը նման քայլերով փորձում է գերիշխող ռամավարական դիրքեր, բարձունքներ, ճանապարհներ գրավել, իրենց սահմանային իրավիճակը բարելավել և ճնշումներ գործադրել Հայաստանի վրա.

«Հայաստանի իշխանություններն ամեն ինչ արեցին,որ Արցախի շուրջ բանակցային գործընթացը ձախողեն,պատերազմ սկսվի և ոչինչ չարեցին,որ պատերազմում մենք պաշտպանենք մեր դիրքերը, հաջողություններ ունենանք: Առանց մարտական գործողության հանձնվեցին մի շարք տարածքներ, իսկ այսօր էլ ամեն օր ադրբեջանցիները պարտադրում են մեր իշխանություններին, մեր սահմաններն են գծում»,-ասաց Սեյրան Օհանյանը՝ ավելացնելով՝ հակառակորդն ամեն ինչ անում է, որ հոգեբանական, աշխարհագրական և ռազմաքաղաքական ճնշումները միջազգային հարթակում Հայաստանի վրա շարունակվեն՝ իրենց ծրագրերն իրականացնելու համար:

Նրա համոզմամբ՝ հակառակորդի հիմնական նպատակը Սյունիքի վրայով Նախիջևանից դեպի Ադրբեջանի հիմնական սահման միջանցք կամ ճանապարհ բացելն է, ինչպես նաև տարբեր հատվածներում գերիշխող դիրքեր գրավել և անկլավների հարցը լուծել՝ հօգուտ իրենց.

«Մեր իշխանություններն ի վերջո պետք է հասկանան հետևյալը՝ հողեր հանձնելով և անկլավներ տալով մենք թուրքերի հետ խաղաղության չենք գնա, թուրքը եթե զգաց մեր թուլությունը, անընդհատ ճնշումներ է գործադրելու մեզ վրա: Կարծում եմ, որ Հայաստանի իշխանությունները Սյունիքի , Գեղարքունիքի հատվածներով հակառակորդի առաջխաղացումներից խելքի չեն եկել»,-ասաց ՊՆ նախկին նախարարը և ավելացրեց. « Շատ կցանկանամ, որ Երասխի հատվածում մերոնք հաջողությունների հասնեն, ոչ մի կարևոր ռազմավարական կետ չզիջեն Ադրբեջանին և կարողանան Ադրբեջանի քիթը ջարդել: Ոչ մի սանտիմետր, ոչ մի միլիմետր տարածք Ադրբեջանին պետք չէ զիջել:

Սահմանային ճշտումները կարող են լինել միայն այն ժամանակ, երբ հակամարտող պետությունները դառնում են հարևան պետություններ, Ադրբեջանը մեզ հարևան պետություն չէ, Ադրբեջանի ղեկավարության հռետորաբանությունը խաղաղության մասին զուգակցվում է սահմանային բախումներով, նրանք, շարունակում են իրենց հայատյացության և ծավալապաշտական քաղաքականությունը: Թուրքերի հետ խաղաղության գնալ այսպիսի պայմաններում չի կարելի»,-ասաց Օհանյանը:

Անդրադառնալով սահմանին տիրող լարված իրավիճակի ֆոնին ՊՆ նախարարի հրաժարականին,Սեյրան Օհանյանն ասաց.

«Ես չեմ կարծում դա սահմանային իրավիճակից է կախված, կարծում եմ, ԶՈՒ սխալ կառավարումից և ընդունված սխալ որոշումներից կարող է կախված լինել»:

Աղբյուր` Փաստինֆո