Փաստ ինֆո

Պրոֆեսոր Արմեն Չարչյանի պաշտպանները միջնորդություն ներկայացրին դատարան՝ Չարչյանի նկատմամբ ընտրված խափանման միջոց կալանավորումը գրավով փոխարինելու մասին։ Երևանի ընդհանուր իրավասության դատարանում՝ դատավոր Վահե Միսակյանի նախագահությամբ, այս պահին ընթացնում է միջնորդության քննարկումը։

Նշենք, որ դատավոր Արմինե Մելիքսեթյանը մասնակի բավարարել էր Արմեն Չարչյանի նկատմամբ կալանավորումը որպես խափանման միջոց ընտրելու մասին միջնորդությունը՝ կալանավորելով նրան մեկ ամիս ժամկետով։ Դատարանը հաստատված էր համարել հնարավոր խոչընդոտման ռիսկը, ինչը պաշտպանների դիտարկմամբ՝ այս պահի դրությամբ ընդհանրապես վերացել է, քանի որ քրեական գործով բոլոր վկաներն արդեն հարցաքննվել են, ավելին՝ Չարչյանի դեմ չկա որևէ մեղադրական բնույթի ցուցմունք։ Փաստաբան Էրիկ Ալեքսանյանը «շնորհակալություն» հայտնեց դատավոր Մելիքսեթյանին, քանի որ վերջինս մասնակի է բավարարել միջնորդությունն այն դեպքում, երբ դատախազը պնդում էր, թե գործով կան մոտ 80 վկա, որոնց մասնակցությամբ դեռևս գործողություններ չեն իրականացվել և չի բացառվում, որ Չարչյանը կարող է ազդեցություն ունենալ։ Ըստ պաշտպանության կողմի՝ գործով բոլոր վկաներն արդեն հարցաքննվել են, տվել ցուցմունքներ, հետևաբար, Չարչյանը, մնալով ազատության մեջ, չի կարող ազդեցություն ունենալ գործով վկաների նկատմամբ։

Պաշտպանը նաև տեղեկացրեց, որ Չարչյանի մասնակցությամբ առերես հարցաքննություն նախաքննության ընթացքում տեղի չի ունեցել, ուստի, նրա դեմ մեղադրական բնույթի ցուցմունք տված անձինք չկան։ Էրիկ Ալեքսանյանն ընդգծեց՝ առկա են բոլոր հիմքերը՝ Արմեն Չարչյանի նկատմամբ ընտրված խափանման միջոց կալանավորումը գրավով փոխարինելու համար։

Արամ Վարդևանյանն էլ ընդգծեց, որ թեև գտնում են, որ Արմեն Չարչյանի նկատմամբ առհասարակ որևէ խափանման միջոց կիրառելու անհրաժեշտություն չկա, բայց միևնույն ժամանակ, ընդունելի են համարում գրավի կիրառումը՝ գրավի չափը թողնելով դատարանի հայեցողությանը։ Մեղադրող դատախազը առարկեց միջնորդության դեմ՝ պնդելով, որ պրոֆեսորը պետք է մնա կալանքի տակ։

Հիշեցնենք, որ տելեգրամյան մի ալիքում հրապարակվել էր ձայնագրություն, համաձայն որի՝ «Իզմիրլյան» բժշկական կենտրոնի տնօրեն Արմեն Չարչյանը հունիսի 18-ի առավոտյան աշխատակիցների հետ հանդիպմանը հորդորել է, որ աշխատակիցները պարտադիր կարգով մասնակցեն ընտրություններին։ Չարչյանը նշել է, որ եթե որևէ մեկը չմասնակցի ընտրություններին, ապա կիմանա այդ մասին։

Ձայնագրության հրապարակումից հետո հաշված ժամերի ընթացքում ՀՔԾ-ում հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով, որի շրջանակներում նախ բերման են ենթարկել Չարչյանին և տեղափոխել ՀՔԾ, ապա ձերբակալելու որոշում կայացրել։

Պաշտպանները բողոք են ներկայացրել Չարչյանին ձերբակալելու մասին որոշման դեմ, ինչը բավարարվել է քվեարկության օրը և նա դատարանի որոշմամբ ազատ է արձակվել։

Հունիսի 21-ին դատախազությունը հաղորդագրություն տարածեց՝ նշելով, որ ԿԸՀ-ն բավարարել է Արմեն Չարչյանի նկատմամբ հետապնդում իրականացնելու և նրան ազատությունից զրկելու համաձայնություն տալու վերաբերյալ միջնորդությունները։ ԿԸՀ համաձայնությունը ստանալուց հետո ՀՔԾ֊ն մեղադրանք է առաջադրել Արմեն Չարչյանին՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որը մասամբ բավարարվել էր դատավոր Արմինե Մելիքսեթյանի կողմից։

Հեղինակ՝ Իզաբել Սահակյան

Աղբյուր` Փաստինֆո