Փաստ ինֆո

Երասխը Երևանի դարպասն է, Երասխի հարևանությամբ է գտնվում նաև Քյարքին: Այս տարածքը սադրանքների մեջ պահելով՝ հակառակորդը ցանկացած պահի կարող է անցնել հարձակվողական գործողությունների և մտնել ՀՀ տարածք, ինչպես դա եղավ Սյունիքի և Գեղարքունիքի տարածքում: «Փաստինֆո»-ի հետ զրույցում ասաց ռազմական փորձագետ Հայկ Նահապետյանը:

Հիշեցնենք, որ վերջին շրջանում իրավիճակը հայ-ադրբեջանական սահմանի Երասխի հատվածում լարվել է: Ինչպես հայտնել է ՀՀ ՊՆ-ն՝ երեկ մինչև ուշ գիշեր ադրբեջանական զինված ուժերը գնդակոծել են հայ-ադրբեջանական սահմանի Երասխի հատվածում տեղակայված հայկական դիրքերը, օգտագործել անգամ ականանետեր։

Ռազմական փորձագետն ընդգծեց, որ Երասխը Հայաստանի, հատկապես՝ Երևանի համար, ստրատեգիական նշանակություն ունի:
Զրուցակիցը նկատեց, որ հակառակորդն իր գործողություններ չի սկսում Տիգրանաշենի կողմից, այլ սկսում է իր համար առավել կարևոր նշանակություն ունեցող Երասխից.

«Չի բացառվում, որ հարվածը երկկողմանի լինի՝ Տիգրանաշեն և Երասխ: Հակառակորդը պատրաստվում է Նախիջևանի սահամանամերձ ողջ հատվածներում հարձակման, իսկ մենք պատրա՞ստ են դիմագրավելու: Ժողովուրդը հոգեբանորեն չի զգում մեծ պատերազմի վտանգ, հույսը դրել է անորոշության վրա, լավագույն դեպքում, որ Ռուսաստանի կկատարի իր դաշնակցային պարտավորությունները:Բայց Ռուսաստանը կկատարի միայն այն դեպքում, երբ մենք դիմադրենք, իսկ օրվա իշխանությունները նման նպատակ չեն դրել»,-ասաց Հայկ Նահապետյանը:

Նրա խոսքով՝ Ադրբեջանի մոտ հայկական կողմի ոչ լիարժեք պատասխանը անպատժելիության մթնոլորտ է առաջացնում և գայթակղություն՝ անընդհատ նորը վերցնել, ընդ որում, վերցնում է իր համար ստրատեգիական նշանակություն ունեցող տարածքներ.

«Երասխի հատվածը, ինչպես նաև Հայաստանի միջպետական ճանապարհի վրա դուրս գալը ստրատեգիական նշանակություն ունի Ադրբեջանի համար:Այս կողմից վտանգ միշտ էլ զգալու ենք, քանի դեռ համարժեք պատրաստվածություն չունենք, իսկ օրվա իշխանությունը նման խնդիր իր առջև չի դրել: Աշխարհազորի մասին ինչ-որ օրենք ընդունեցին, որը մնաց թղթի վրա: Ադրբեջանը և Թուրքիան չեն թաքցնում Հայաստանից նոր տարածքներ վերցնելու իրենց մտադրությունը, իսկ օրվա իշխանությունները, չգիտեմ՝ ինչի՞ն են ապավինում:

Ամենայն հավանականությամբ, մտածում են, որ մեր ռազմավարական դաշնակիցը կգա և մեր փոխարեն կկռվի, բայց մենք պետք է կռվենք, նրանք էլ մեզ օգնեն:Իշխանությունները հոգեպես չեն պատրաստում ժողովրդին, զորակայաններ և աշխարհազոր չի ստեղծվում, իսկ սա նշանակում է, որ Հայաստանը և այս տարածքում բնակվող քաղաքացիները զոհասեղանին են դրված, սա դաժան և ցավալի իրականություն է»,-ասաց փորձագետը,- ընդգծելով, որ նոր պատերազմի վտանգ կա՝ աշխարհաքաղաքական իրողությունների շրջանակում:

Աղբյուր` Փաստինֆո