Փաստ ինֆո

Ադրբեջանը ուզում է, Ադրբեջանը պահանջում է՝ այս իմպերատիվ ոճով նախադասությունները 2020 թվականի 44-օրյա պատերազմից և կապիտուլյացիոն պայմանագրի ստորագրումից հետո առավել քան հաճախադեպ են դարձել։

Առավոտյան արթնանում ենք և պարզում, որ թումանյանական «Չարի վերջը» վերջ չունի։ «Աղա աղվեսի» կերպարանքով հանդես եկող իլհամ ալիևը, քանի որ իր դիմաց տեսնում է թույլ ու տկար, իր երկիրն ու զավակներին պաշտպանելու անկարող, անողնաշար իշխանություն, ինչ խելքը բրդի՝ ուզում է։ Ընդ որում, հետաքրքիր մուտացիաներ են տեղի ունեցել սույնի ուղեղում՝ այն, ինչ նա առաջ որպես կուտ տալիս էր իր ժողովրդին՝ ասենք՝ Երևանն ու Սևանը մերն են՝ հռետորաբանությամբ, այսօր նույնաբովանդակ կտեր է բաց թողնում Հայաստանի և հայերի ուղղությամբ։

ՈՒշագրավ է, որ ներկա իշխանությանն ու նրա ղեկավարին ադրբեջանցիները «սվոյ» են համարում․ քանի որ հենց սրանց օրոք էր, որ կարողացան իրականացնել այն, ինչ երազում չէին տեսնի։ Շուշի, Հադրութ․․․ Բնականաբար, երբ թշնամին իր առջև տեսնում է ցանկացած զիջման պատրաստ իշխանություն, իր ծավալապաշտական ցանկություններն էլ ընդլայնում է։ Մանավանդ, երբ տեսնում է, որ շատ լավ է գործում ինչպես՝ հողի դիմաց՝ փող, այնպես էլ՝ փողի դիմաց՝ կոմունիկացիաներ, իբր շրջափակման վերացում սկզբունքը։ Ինչն ուղղակիորեն Հայաստանի՝ առանց այդ էլ տկարացած տնտեսությունը կուլ տալ, խժռել է նշանակում։

Այս պարզ ճշմարտությունը չե՞ն հասկանում հայ որոշ գործարարներ, որ անհասկանալի հրճվանքով խոսում են Արևմտյան Հայաստանում բիզնեսներ ծավալելու մասին, թե՞ գործում է զուտ բիզնես մտածողությունը։ Առանց այդ էլ Թուրքիան էլ, Ադրբեջանն էլ՝ մեկ հարյուրամյակ հայկական ժառանգության հաշվին հարստանում են։

Ասել, թե ալիևը առյուծասիրտ մեկն է, զավեշտալի կլինի։ Պարզապես նրան 20 -ամյա պարտությունն է դաս եղել։ Իսկ «ազարբայջան» կոչվող հորինված պետության պատմությունը սկսվում է 1918 թվականից։ Եվ նրա առաջնորդները՝ էն գլխից են յուրացրել, որ 100 անգամ ասված սուտը դառնում է ճշմարտանման, իսկ այդ ամենն արդեն հեշտ է անտեղյակներին հրամցնել որպես ճշմարտություն՝ եթե ուղեկցվում է հսկայական գումարներով, նպատակային ծրագրերով, գիտական ու հրատարակչական ահռելի հորինված նյութի ստեղծմամբ, աշխարհի խոշոր մայրաքաղաքներում բազմալեզու հրատարակություններով և տարածմամբ։ Եվ այդ էլ անում են տասնամյակներ շարունակ։

Հեղինակ՝ Ա․Ե․

Աղբյուր` Փաստինֆո