Փաստ ինֆո

Վարչապետի պաշտոնակատար Նիկոլ Փաշինյանն իր նախընտրական քարոզարշավը տարավ մուրճի սպառնալիքով։ Այդ ընթացքում նրա հիմնական խոստումներն էին ՝ ասֆալտին փռելը, կադրային ջարդերը, քաղաքական վենդետաները։ Այսպիսի նախաբանով մեկնարկեց Այլընտրանքային նախագծեր խմբի կողմից կազմակերպված «ՀՀ քաղաքական և իրավական մարտահրավերները» թեմայով  կոնֆերանսը։ Այլընտրանքային նախագծեր խմբի անդամ Էլինար Վարդանյանի գնահատմամբ, ընտրություններից անմիջապես հետո Սյունիքի համայնքապետերի համատարած ձերբակալություններն ու կալանավորումները վկայում են, որ իրավական գործընթացների անվան տակ կատարվում են  քաղաքական հետապնդումներ։

«Սյունիքի համայնքապետերը, որոնք այդ ամբողջ ընթացքում չհամաձայեցին անցնել Փաշինյանի թրի տակով, նրանց նկատմամբ սկսվեցին քաղաքական հետապնդումները, իսկ իրավապահներն անշեղորեն կատարում են Փաշինյանի բոլոր ցուցումները»։

Կոնֆերանսին հրավիրված ԱԺ նախկին պատգամավոր, գրող, հրապարակախոս Աղվան Վարդանյանն էլ անդրադառնալով բարձրացված հարցին նշեց, որ դեռևս երկու տարի առաջ է ասվել, որ Հայաստանն այլևս իրավական պետություն չէ, և  որ Հայաստանում այլևս մեկ մարդու բացարձակ իշխանություն է։ Նրա խոսքով՝ երկրի ներսում աչք ու ականջ ունեցողները դա շատ լավ գիտակցում են։

«Թե ինչ հետևանքներ է ունենում այդպիսի իշխանությունը, երբ անձը փոքրոգի, քինախնդիր, ստախոս, ազգային, հոգևոր բարոյական արժեքներից զուրկ մեկն է, դրա համար  պետք չէ պատմությունն ուսումնասիրել, բավարար է մեր պետության ու հասարակության ներկա պատկերը»,-կարծում է  Վարդանյանը։

Նրա գնահատմամբ՝  երբ էությամբ վախկոտ անձը տիրապետում է  իշխանության ուժային լծակների, համընդհանուր աղետն ու ավերն անխուսափելի է. «Ինքնիշխանության  նվազագույն շեմ, պետականության կորստի  իրական վտանգ, ատոմացված հասարակություն, դիմադրողականության քայքայում։ Ահա , թե ինչ է տեղի ունենում նման դեպքում։  Այդպիսի անձի վարքի ևս մեկ յուրահատկություն է՝ ստորանալ իրենից ուժեղ  ցանկացածի, թեկուզ  թշնամու առջև, վախեցնել, նվաստացնել իրենից կախում ունեցողներին և իր ենթականերին»,- նշեց Վարդանյանն ու վերստին ընդգծեց, որ բռնաճնշումները հատուկ են այդպիսի անձին։

Դիմելով   Ոստիկանապետին, ԱԱԾ տնօրենին, ՀՔԾ պետին, Գլխավոր դատախազին, ԲԴԽ նախագահին՝ Աղվան Վարդանյանը հորդորեց առավել զգոն լինել, տարբերել կարևորն անկարևորից, ներքին թշնամուն՝ արտաքին թշնամուց, սատանաներին՝ քաղաքացիներից, պետությունը՝ մեկ անձի տնամերձից։  

«Հիշե՛ք, նա ոչ մեկի ծառայությունները չի գնահատելու, հիշեք ձեր մի քանի նախորդներին։ Այն բռնաճնշումները, որոնք անում եք այսօր, ահաբեկչություն է  պետականության և հայկականության հանդեպ»,- եզրափակեց Աղվան Վարդանյանը։

Աղբյուր` Փաստինֆո