Փաստ ինֆո

Հայաստանի նորանկախ պատմության մեջ նման խայտառակություն, իրավական և քաղաքական «բեսպրեդել» երբեք չի եղել։ Այս մասին դատարանի բակում լրագրողների հետ զրույցում ասաց «Հայաստան» դաշինքի անդամ Իշխան Սաղաթելյանը՝ անդրադառնալով Սյունիքի համայնքապետերի դեմ հարուցված քրեական գործերին.

Նրա խոսքով՝ Նիկոլ Փաշինայնը փորձում է երկրում դիկտատուրա հաստատել.

«Սա ակնհայտ քաղաքական հետապնդում է։ Ի՞նչ է նշանակում ընդդիմադիր կուսակցության ցանկից պատգամավորի թեկնածուներին նման խայտառակ և կեղծ մեղադրանքներով բերման ենթարկել ու փորձել կալանավորել, սա խայտառակություն է: Ակնհայտ է, որ այս ամեն ինչը չի կարող լավ ավարտ ունենալ։ Սա բերելու է նոր ճգնաժամի, սա մենք չենք հանդուրժելու, երբեք չենք կարող համակերպվել այս իրավիճակի հետ»-ասաց Իշխան Սաղաթելյանը:

Վերջինիս համոզմամբ՝ քաղաքական հետապնդումներից զատ այս ամենն արվում է նաև հատուկ նպատակով՝ Սյունիքը թուլացնելու, հասարակության դիմադրողականությունը կոտրելու ու ցավոտ, նոր զիջումների գնալու համար։

«Այս մարդն Ալիևի հետ պասերով խաղում է, ուրիշ բնութագրում չկա»,- ասաց Սաղաթելյանը։

ՀՅԴ ԳՄ ներկայացուցիչը նշեց, որ եթե երկրում չկա Սահմանադրություն, ապա պետք է կազմակերպված ձևով շարունակել պայքարն այս իշխանության դեմ և փորձել նրանց հեռացնել.

«Իրենք շատ լավ հասկանում են՝ չի կարող 53 տոկոս հավաքած իշխանությունն իրեն պահել այսպես։ Իրենք հասկանում են, որ իրենց իշխանությունը ժամանակավոր է եւ փորձում են այս ճանապարհով երկարացնել իրենց իշխանությունը և ջարդել մեր ժողովրդի դիմադրողականությունը»։

Անդրադառնալով վերջին շրջանում Երասխի հատվածում հակառակորդի ակտիությանը՝ Սաղաթելյանն ասաց, որ քանի գործող իշխանությունը կա, ամեն առավոտ պետք է սպասել հերթական վատ լուրի.

«Մենք ասել ենք, որ այս իշխանության վերարտադրությունը հավասար է պետականության կորստին։ Եթե Ալիևն ասում է՝ մենք ունենք Արևելյան Զանգեզուր, գնում ենք Արևմտյան Զանգեզուրը վերցնելու, խոսում է արդեն Երևանից, Սևանից, իսկ այս մարդն ընկել ու մեր ժողովրդին է ձերբակալում։

Ձերբակալում է այն մարդկանց, որոնք կազմակերպում էին իրենց մարզի ինքնապաշտպանությունը։ Նոր գերիներ, նոր կորուստներ, ինչո՞ւ են բանակից հեռացնում ամենակայացած, ամենամարտական հրամանատարներին։ Այս ամենը քողարկում է տարբեր կեղծ, ծիծաղելի, արդեն զզվելի, բայց երբեմն ժողովրդի ականջին հաճելի լոզունգներով»,-ասաց Իշխան Սաղաթելյանը:

Աղբյուր` Փաստինֆո