Փաստ ինֆո

Ուզում եմ հավատալ, որ արդարադատության փշրանքներ մնացել են։ Ակնկալում ենք, որ մի դատավոր կհայտնվի, որն իր սկզբունքներին դեմ չի գնա և այս շինծու գործերին վերջ կտա։ Լրագրողների հետ զրույցի ժամանակ ասաց «Հայաստան» դաշինքի անդամ Վահե Հակոբյանը։

Անդրադառնալով Գորսիս քաղաքապետ Առուշ Առուշանյանի կալանավորմանը՝ Վահե Հակոբյանն ասաց, որ եղավ այն, ինչ պետք է լիներ.
«Երեկ ասացի, որ համոզված եմ՝ Առուշանյանին տանելու են կալանքի ու այդ մի կնոջ ցուցմունքի հիման վրա, որը մի քանի անգամ փոփոխվել է։ Համոզված եմ՝ այդ կինը եղել է ճնշումների տակ ու այդ ցուցմունքով իրեն դրել է ոչ երանելի վիճակում։ Նրա վրա էլ հեսա քրեական հոդված կդրվի, կամ հատուկ ծառայության համար ազատ կարձակեն»,-ասաց Վահե Հակոբյանը։

Վերջինս նշեց, որ այս ամենը վրեժխնդրության հետևանք է։ Վահե Հակոբյանը համոզմունք հայտնեց, որ կկալանավորեն նաև Սիսիանի համայնքապետ Արթուր Սարգսյանին։

«Այսօր սպասում ենք Զանգեզուրի պղնձամոլիբդենային կոմբինատի անվտանգության ղեկավարին կալանավորելու վերաբերյալ դատարանի որոշմանը։ Մարդը ստաբիլ տեմպերով գլխատում է և՛ Սյունիքը, և՛ կոմբինատը»,-նշեց Վահե Հակոբյանը։

Հարցին՝ ենթադրություն ունի՞, թե Քարահունջի համայնքապետ Լուսինե Ավետյանն ինչ ցուցմունք է տվել, Վահե Հակոբյանն ասաց, որ մոտավորապես գիտի. «Իբրև թե Առուշանյանը հրավիրել է և նրանց ուղղորդել, որ պետք է աշխատեն «Հայաստան» դաշինքի օգտին։ Դա այդ կնոջ երրորդ ցուցմունքն է, որն իրենից կորզել են այն ժամանակ, երբ նա արդեն կալանավայրում էր»,-ասաց Վահե Հակոբյանը։

Աղբյուր` Փաստինֆո