Փաստ ինֆո

Դատախազությունը բովանդակազուրկ միջնորդությամբ փորձում է ցույց տալ ինտենսիվ աշխատանք, որ ձախողված քրեական վարույթով դատախազությունը չի հանձնվում, շարունակում է աշխատել, մինչդեռ նախատեսելի էր այս վարույթի տվյալ ընթացքը, հոդվածի հակասահմանադրականության հարցը բարձրացվել է դեռևս նախաքննության փուլում: Այս մասին Վերաքննիչ քրեական դատարանում Ռոբերտ Քոչարյանի և մյուսների գործով քրեական հետապնդումը դադարեցնելու որոշման դեմ բողոքների գործով նիստի ընթացքում ասաց Ռ. Քոչարյանի պաշտպանական խմբի անդամ Հովհաննես Խուդոյանը՝ անդրադառնալով մեղադրող Գևորգ Բաղդասարյանի կողմից ներկայացված միջնորդությանը: 

Ինչպես արդեն տեղեկացրել ենք՝ նախորդ դատական նիստին մեղադրող դատախազ Գևորգ Բաղդասարյանը միջնորդություն է ներկայացրել՝ ՍԴ դիմելու և գործի վարույթը կասեցնելու մասին։

Խուդոյանը հիշեցրեց, որ վաղեմության ժամկետով գործի վարույթը կարճելու կամ համաներում կիրառելու վերաբերյալ ինստիտուտները երբևէ սահմանադրականության հարցով կասկածի տակ չի դրվել: Քրեական դատավարության օրենսգրքով հստակ նախատեսված է վարույթը բացառող հանգամանքները և այդ պայմաններում պնդել, որ լրացուցիչ գործիքակազմի բացակայությունը տուժողների իրավունքների սահմանափակումը վկայում է, որ խնդիր է դրվում ոչ թե քրեական, այլ՝ անձնական հետապնդում իրականացնելու:

Խուդոյանն ընդգծեց, որ պաշտպանության կողմի իրավունքները սահմանափակող նորմերը չեն կարող կիրառություն ունենալ, մինչդեռ, ներկայացված միջնորդությամբ դատախազությունն ակնկալում է դատարանի միջոցով հասնել ՍԴ և ՍԴ-ի միջոցով հասնել օրենքի բացի ճանաչման, որը կարող է հիմք հանդիսանալ օրենսդրական փոփոխությունների, որը սույն գործով կիրառվել չի կարող, այն չի կարող ազդել գործի քննության վրա, ուստի, միջնորդությունը բովանդակազուրկ է, արդյունք չի ապահովում:

Փաստաբանի դիտարկմամբ՝ դատախազությունը, նման միջնորդություն ներկայացնելով, փորձում է ցույց տալ ինտենսիվ աշխատանք՝ չխորշելով այնպիսի դիրքորոշում հայտնելուց, որը սահմանափակում է մեղադրյալի, կոնկրետ այս դեպքում՝ արդարացվածի դատավարական բոլոր երաշխիքները: Դատախազության մյուս հնարավոր մոտիվացիան, ըստ Խուդոյանի, այն է, որ դատախազությունը փորձում է կիսել պատասխանատվության բեռը՝ ՀՀ դատարանների հետ, մասնավորապես, դատախազությունը, նախապես իմանալով գործի թերությունները և նախապես գնահատելով ռիսկերը, գործը հասցրել է այն փուլին, որ այն կարճվել է՝ հոդվածի հակասահմանադրականության հիմքով, ուստի՝ դատախազության պատասխանատվության ներքո է վարույթի տապալումը:

Հիշեցնենք, որ մարտի 26-ին ՍԴ-ն ՀՀ քրեական օրենսգրքի 300.1-րդ հոդվածը ճանաչել է Սահմանադրության 78-րդ և 79-րդ հոդվածներին հակասող և անվավեր՝ բավարարելով ՀՀ երկրորդ նախագահ Ռոբերտ Քոչարյանի և Երևանի ընդհանուր իրավասության դատարանի դատավոր Դավիթ Գրիգորյանի դիմումները։

ՍԴ որոշումից հետո ՀՀ գլխավոր դատախազ Արթուր Դավթյանն այս գործով դիմել է ՍԴ, իսկ ՀՀ երկրորդ նախագահի և մյուսների գործով մեղադրանքը պաշտպանող դատախազները միջնորդություն են ներկայացրել՝ քրեական գործի վարույթը կասեցնելու մասին, իսկ պաշտպանական կողմը միջնորդություն էր ներկայացրել՝ քրեական հետապնդումը ՀՀ քրեական օրենսգրքի 300.1-րդ հոդվածով դադարեցնելու և այդ մասով քրեական գործի վարույթը կարճելու մասին։

Բացի այդ՝ Ռոբերտ Քոչարյանի պաշտպանները նաև միջնորդություն էին ներկայացրել՝ Ռոբերտ Քոչարյանի նկատմամբ ընտրված խափանման միջոց գրավի չափը նվազեցնելու կամ անազատության հետ կապ չունեցող այլ խափանման միջոցով փոխարինելու մասին։

Ապրիլի 6-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, արդարացման հիմքով դադարեցրել է Ռոբերտ Քոչարյանի, Յուրի Խաչատուրովի, Արմեն Գևորգյանի, Սեյրան Օհանյանի նկատմամբ քրեական հետապնդումն ՝ ՀՀ քրեական օրենսգրքի 300.1-րդ հոդվածի հատկանիշներով։ Միևնույն ժամանակ դատարանը մերժել է Ռոբերտ Քոչարյանի պաշտպանների՝ խափանման միջոցի վերաբերյալ միջնորդությունը։

Դատախազ Գևորգ Բաղդասարյանը վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը, Ռոբերտ Քոչարյանի և մյուսների նկատմամբ քրեական հետապնդումը դադարեցնելու մասին դատարանի որոշումը բողոքարկել է նաև տուժող կողմը։ Բացի դա՝ պաշտպանության կողմը ևս վերաքննիչ բողոք է ներկայացրել՝ վիճարկելով Ռոբերտ Քոչարյանի խափանման միջոցը փոխելու կամ գրավի չափը նվազեցնելու միջնորդությունը մերժելու մասին որոշման մասով։

Վերաքննիչ բողոքները կքննվեն համատեղ՝ Վերաքննիչ քրեական դատարանի դատավոր Նարինե Հովակիմյանի նախագահությամբ, կազմով՝ դատավորներ Սևակ Համբարձումյանի և Կարեն Մարդանյանի։

Հեղինակ՝ Իզաբել Սահակյան

Աղբյուր` Փաստինֆո