Փաստ ինֆո

ԱԺ այսօրվա արտահերթ նիստում քննարկվում է «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություններ կատարելու նախագիծը, որով առաջարկվում է պատգամավորական գործունեության հետ կապված ծախսերին հատկացվող ամսական 50 հազար դրամը դարձնել 250 հազար դրամ:

Նախագծի քննարկման ժամանակ պատգամավոր Սոֆյա Հովսեփյանը հետաքրքրվեց՝ արդյո՞ք 7-րդ գումարման ԱԺ-ում բոլոր պատգամավորներն այցելեցին մարզեր, և արդյո՞ք պատգամավորները, երբ գործուղումներ է լինում այս գումարից են օգտվում, թե՞ հավելյալ գործուղման ծախսերից:

«Ինչու՞ ենք 200.000 դրամ ավելացնում մի բանի համար, որի ծախսերն առանց այն էլ հոգում են, մարզի պատգամավորներն ունենում են խնդիրներ, որովհետև անընդհատ մազրեր են մեկնում, իսկ Երևան քաղաքի պատգամավորները կամ ցուցակով անցած պատգամավորները, ինչպես տեսանք, մարզեր առհասարակ չայցելեցին կամ գործողումների միջոցով այցելեցին»,-ասաց Հովսեփյանը:

Նախագծի համահեղինակ Վիկտոր Ենգիբարյանն էլ պարզաբանեց, պատգամավորներն իրենց մասնագիտության բերմամբ տարբեր գործունեությամբ են զբաղվում.

«Օրինակ պետաիրավական հարցերի մշտական հանձնաժողովում ներգրավված պատգամավորները օրինաստեղծ աշխատանքի համար հատուկ ծանրաբեռնվածությամբ են աշխատում, մարզերից ընտված պատգամավորները բազմաթիվ առիթներ են ունեցել մարզեր այցելելու և ընտրողների հետ հանդիպելու համար: Այս պատճառով էլ պատգամավորին տրամադրված միջոցները պետք է լինեն պատգամավորի կողմից ուղիղ կառավարելի»,-ասաց Ենգիբարյանը:

Նա նաև նշեց, որ երբ պատգամավորները գործուղում են արտասահման , այս դեպքում ծախսերն ավելի շատ են, ուստի ԱԺ-ն ծածկում է այդ ծախսերը, բայց, նրա խոսքով, հանրապետության ներսում պատգամավորների նյութատեխնիկական սպասարկումը բարելավելու կարիք ունի:

Աղբյուր` Փաստինֆո