Փաստ ինֆո

ՀՀ Կառավարությունը Ազգային ժողովին առաջարկել է հուլիսի 15-ին գումարել արտահերթ նստաշրջան, որի օրակարգում ներառված է 4 հարց: Այս մասին ԱԺ-ում ասաց Էկոնոմիկայի նախարարի պաշտոնակատար Վահան Քերոբյանը և պարզաբանեց օրակարգային հարցերի ընդունման անհրաժեշտությունը:

Նա նշեց, որ «Պետական տուրքի մասին» ՀՀ օրենքում փոփոխություններ և լրացումներ կատարելու մասին նախագծի ընդունման անհրաժեշտությունն առաջացել է միջազգային շուկայում պղնձի և մոլիբդենի գների բարձրացման հետևանքով ընդերքն ավելի լավ պաշտպանելու անհրաժեշտությամբ:

«Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքներում փոփոխություններ կատարելու մասին նախագծով առաջարկվում է պատգամավորների պատգամավորական գործունեության հետ կապված ծախսերի ամսական գումարն ավելացնել՝ սահմանելով 250.000 դրամ: Քերոբյանի խոսքով՝ այս նախագծի անհրաժեշտությունը բխում է պատգամավորների՝ իրենց ընտրողների հետ ավելի սերտ համագործակցելու անհրաժեշտությամբ:

«Նախագծի ընդունումը հրատապ է, իսկ օրենքն ուժի մեջ կմտնի հաջորդ գումարման նստաշրջանի բացման առաջին օրվանից»,-ասաց Քերոբյանը։

«Հայաստանի Հանրապետության և Ասիական զարգացման բանկի միջև «Հայաստան-Վրաստան սահմանային տարածաշրջանային ճանապարհի (Մ6 Վանաձոր-Բագրատաշեն) բարելավման ծրագիր» (վարկ թիվ 3449-ARM) վարկային համաձայնագրի փոփոխությունը վավերացնելու մասին» նախագծով նախատեսվում է վարկի երկարաձգում 2021թ-ի մայիսի 31-ից մինչև 2022թ. դեկտեմբերի 31-ը:

«Վարչական իրավախախտումների վերաբերյալ ՀՀ օրենսգրքում» փոփոխությունների նախագիծը, Վահան Քերոբյանի խոսքով, բխում է Աշխատանքի և առողջապահական տեսչական մարմնի բնականոն գործունեությունն ապահովելու համար համապատասխան նախադրյալներ ստեղծելու և տեսչական մարմինի կողմի քննվող վարչական իրավախախտումների շրջանակը հստակեցնելու համար.

«Նախագծի հրատապությունը պայմանավորված է նրանով, որ սույն օրենքի նախագիծը չընդունելու դեպքում Առողջապահական և աշխատանքի տեսչական մարմինը զրկվում է որոշակի ոլորտներում վերահսկողություն իրականացնելու հնարավորությունից»,-ասաց Քերոբյանը:

Աղբյուր` Փաստինֆո