Փաստ ինֆո

Վերաքննիչ քրեական դատարանում՝ դատավոր Նարինե Հովակիմյանի նախագահությամբ, կազմով՝ դատավորներ Սևակ Համբարձումյանի և Կարեն Մարդանյանի, մեկնարկել է ՀՀ երկրորդ նախագահ Ռոբերտ Քոչարյանի, Արմեն Գեւորգյանի, Սեյրան Օհանյանի եւ Յուրի Խաչատուրովի նկատմամբ ՀՀ քրեական օրենսգրքի 300.1-րդ հոդվածով դադարեցնելու մասին որոշման դեմ բողոքների գործով դատական նիստը:

Ինչպես արդեն տեղեկացրել ենք՝ նախորդ դատական նիստին մեղադրող դատախազ Գևորգ Բաղդասարյանը միջնորդություն է ներկայացրել՝ ՍԴ դիմելու և գործի վարույթը կասեցնելու մասին;

«Փաստինֆո»-ի հաղորդմամբ՝ դատախազի միջնորդության վերաբերյալ այսօր կայացած դատական նիստին պաշտպան Էրիկ Ալեքսանյանն արձանագրեց, որ դժվար է պատկերացնում նշված միջնորդության՝ այս փուլում լուծումը, քանի որ, ըստ փաստաբանի, դա կարող է կանխորոշել բողոքի քննության արդյունքում կայացվող որոշումն, ինչն անթույլատրելի է և կիմաստազրկի բողոքի քննությունը:

Ըստ Ալեքսանյանի՝ նշված միջնորդության վերաբերյալ որոշումը պետք է կայացվի վերջում՝ բողոքների վերաբերյալ ակտի կայացմանը համատեղ:

Ինչ վերաբերում է ՍԴ դիմելու հիմքերին, ապա Ալեքսանյանի դիտարկմամբ՝ նման հիմքեր առկա չեն ինչպես առաջին ատյանի դատարանում, այդպես էլ՝ այս պահին և, ՍԴ չդիմելով, առաջին ատյանի դատարանը թույլ չի տվել դատավարական որևէ նորմի խախտում:

«ՍԴ որոշումից հետո, երբ փաստացի ապաքրեականացվել է Քրեական օրենսգրքի 300.1-րդ հոդվածը, դատարանն ունեցել է իմպերատիվ պարտականություն՝ քրեական հետապնդումը դադարեցնելու և քրեական գործի վարույթը կարճելու մասին»,- նշեց Ալեքսանյանը:

Ըստ փաստաբանի՝ մեղադրանքի կողմը չի կարող օգտագործել դատարանին՝ հետագայում մեղադրանքը փոխելու համար:
«Պարոն Բաղդասարյանը չի միջնորդում, որ դատարանը փոխի մեղադրանքը, քանի որ քաջ գիտակցում է, որ դատարանն այդ գործառույթը չունի, սակայն ցանկանում է օգտագործել դատարանին որպես գործիք, միջոց՝ մեղադրանքի փոփոխման երրորդ ճանապարհը նվաճելու տեսանկյունից»,- նշեց Ալեքսանյանը՝ ընդգծելով, որ ՀՀ քրեական դատավարության օրենսգրքի 35-րդ հոդվածը խնդրահարույց չէ, ՍԴ դիմելու հիմքեր չկան, իսկ միջնորդության լուծումն այս փուլում՝ խնդրահարույց է:

Հիշեցնենք, որ մարտի 26-ին ՍԴ-ն ՀՀ քրեական օրենսգրքի 300.1-րդ հոդվածը ճանաչել է Սահմանադրության 78-րդ և 79-րդ հոդվածներին հակասող և անվավեր՝ բավարարելով ՀՀ երկրորդ նախագահ Ռոբերտ Քոչարյանի և Երևանի ընդհանուր իրավասության դատարանի դատավոր Դավիթ Գրիգորյանի դիմումները։

ՍԴ որոշումից հետո ՀՀ գլխավոր դատախազ Արթուր Դավթյանն այս գործով դիմել է ՍԴ, իսկ ՀՀ երկրորդ նախագահի և մյուսների գործով մեղադրանքը պաշտպանող դատախազները միջնորդություն են ներկայացրել՝ քրեական գործի վարույթը կասեցնելու մասին, իսկ պաշտպանական կողմը միջնորդություն էր ներկայացրել՝ քրեական հետապնդումը ՀՀ քրեական օրենսգրքի 300.1-րդ հոդվածով դադարեցնելու և այդ մասով քրեական գործի վարույթը կարճելու մասին։

Բացի այդ՝ Ռոբերտ Քոչարյանի պաշտպանները նաև միջնորդություն էին ներկայացրել՝ Ռոբերտ Քոչարյանի նկատմամբ ընտրված խափանման միջոց գրավի չափը նվազեցնելու կամ անազատության հետ կապ չունեցող այլ խափանման միջոցով փոխարինելու մասին։
Ապրիլի 6-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, արդարացման հիմքով դադարեցրել է Ռոբերտ Քոչարյանի, Յուրի Խաչատուրովի, Արմեն Գևորգյանի, Սեյրան Օհանյանի նկատմամբ քրեական հետապնդումն ՝ ՀՀ քրեական օրենսգրքի 300.1-րդ հոդվածի հատկանիշներով։ Միևնույն ժամանակ դատարանը մերժել է Ռոբերտ Քոչարյանի պաշտպանների՝ խափանման միջոցի վերաբերյալ միջնորդությունը։

Դատախազ Գևորգ Բաղդասարյանը վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը, Ռոբերտ Քոչարյանի և մյուսների նկատմամբ քրեական հետապնդումը դադարեցնելու մասին դատարանի որոշումը բողոքարկել է նաև տուժող կողմը։ Բացի դա՝ պաշտպանության կողմը ևս վերաքննիչ բողոք է ներկայացրել՝ վիճարկելով Ռոբերտ Քոչարյանի խափանման միջոցը փոխելու կամ գրավի չափը նվազեցնելու միջնորդությունը մերժելու մասին որոշման մասով։

Վերաքննիչ բողոքները կքննվեն համատեղ՝ Վերաքննիչ քրեական դատարանի դատավոր Նարինե Հովակիմյանի նախագահությամբ, կազմով՝ դատավորներ Սևակ Համբարձումյանի և Կարեն Մարդանյանի։

Հեղինակ՝ Իզաբել Սահակյան

Աղբյուր` Փաստինֆո