Փաստ ինֆո

Ադրբեջանցի զինվորականների ներկայությունը ՀՀ ճանապարհներին սահմանափակում է մարդկանց ազատ տեղաշարժը: Այսօրվա ասուլիսին ասաց Արման Թաթոյանը և հավելեց, որ բնակիչները երեկոյան ժամերին խուսափում են օրինակ Գորիս-Կապան ճանապարհով երթևեկելուց, հատկապես խուսափում են Կապանից մինչև ճակատեն և մյուս գյուղեր երթևեկելուց.

«Խոսքը վերաբերվում է ոչ միայն ճանապարհներին, այլ նաև նրանց դրոշների և ցուցանակների առկայությանը: Ադրբեջանցիներն ակնհայտորեն դրանք բերել են հոգեճնշման կամ ահաբեկման նպատակով, նաև օգտագործում են առիթը և իբր իրենց ցուցանակները պաշտպանելու համար զինվորականներ են տեղակայում, որոնք բոլորը զենքով մարդիկ են»,-ասաց Թաթոյանը:

Նրա արձանագրմամբ՝ սահմանային գործընթացի արդյունքում խախտված են նաև երեխաների իրավունքները.
«Այս աստիճան ռազմականացված սահմանային հատվածներ, որտեղ ապրում են քաղաքացիական բնակիչներ և երեխաներ, չեք գտնի»,-ասաց Թաթոյանը և ընդգծեց, որ ոտնահարված են նաև ջրի և սննդի իրավունքը.

«Խոսքը վերաբերվում է Մեղրիի Զվարագետ վտակին: Ադրբեջանցիները արդեն 5 տարուց ավել է փոխել են Զվարագետ վտակի հունը և այդ վտակն այլևս չի միախառնվում Մեղրիի մայր գետին, դրա համար էլ լրջագույն խնդիրներ են առաջանում ջրի հասանելիության հետ կապված»,-ասաց Թաթոյանը և նշեց, որ ադրբեջանցիները, ներխուժելով Սև լճի տարածք, այստեղ ևս ջրային պաշարներն իրենց վերահսկողության տակ են վերցրել.

«Գեղարքունիքում ևս կան ջրային ավազաններ, որոնք այժմ գտնվում են ադրբեջանական զինվորների վերահսկողության ներքո»:

Աղբյուր` Փաստինֆո