Փաստ ինֆո

Մեր երկրի դատախազը, քննիչը, ոստիկանը, ցավոք, արդեն նաև դատավորը մեկ մարդ է՝ ՀՀ վարչապետի աթոռը զբաղեցնող անձը, որը հետևողականորեն քաղաքական հետապնդումներ է իրականացնում: Այս մասին ասուլիսի ժամանակ հայտարարեց ՀՅԴ ԳՄ ներկայացուցիչ, «Հայաստան» դաշինքի անդամ Իշխան Սաղաթելյանը.

«Նիկոլ Փաշինյանը կայացնում է քաղաքական որոշումներ, իսկ ուժային կառույցներին և իրավապահներին մնում է միայն իրենց երևակայության արդյունքում կեղծ մեղադրանքներ հորինել և հստակ հետապնդումներ իրականացնել տվյալ դեպքում Սյունիքի համայքապետերի նկատմամբ և «Հայաստան» դաշինքի աջակիցների, համախոհների նկատմամբ»,-ասաց Սաղաթելյանը:

Նրա խոսքով՝ Հայաստանում հստակ շարունակվում է մեր երկրի դիմադրողականությունը կոտրելու և ջարդելու քաղաքականությունը.
«Այն բոլոր ուժեր և անհատները, որոնք մեր ազգային դիմադրողականության պահպանողն են, փորձում են իրենց մեկուսացնել և շարքից դուրս հանել նրանց»,-ասաց Սաղաթելյանը:

Նրա համոզմամբ՝ պատահական չէ, որ այս ամենը տեղի է ունենում Սյունիքում, ինչպես նաև Տավուշում.

«Լավագույն զինվորականներին հեռացնում են բանակից, պատահական չէ, որ պատերազմի ժամանակ Սյունիքի ինքնապաշտպանությունը կազմակերպած համայնքի ղեկավարներին այսօր ձերբակալում են և կալանավորում: Այս ամենը կապում ենք նաև առաջիկայում Հայաստանին սպասվող ցավոտ լուծումների հետ»,-ասաց նա և հավելեց. «Քաղաքական հետապնդումները շարունակվում են, և մենք բոլոր հնարավոր միջոցներով պայքարելու ենք սրա դեմ, որպեսզի թույլ չտանք մեր ժողովրդի դիմադրողականությունը և ապօրինի մեղադրանքներով մեկուսացնել մեր համակիրներին»:

Աղբյուր` Փաստինֆո