Փաստ ինֆո

Կապ չունի, դա ինչպես կկոչվի՝ ճանապարհ, թե միջանցք, ցանկացած երկաթուղի, որն անցնում է Հայաստանի տարածքով և վերահսկելի չէ Հայաստանի կողմից, դա ուղիղ հարված է մեր ինքնիշխանությանը: «Փաստինֆո»-ի հետ զրույցում ասաց անվտանգության հարցերով փորձագետ Արմեն Մանվելյանը: Հիշեցնենք, որ փոխվարչապետի պաշտոնակատար Մհեր Գրիգորյանը լրատվամիջոցներից մեկի հետ զրույցում ակնարկել էր, որ թեև միջանցքի հարց չի քննարկվում, բայց օրակարգում կա ճանապարհի հարց եւ չի բացառվում՝ հենց Մեղրիով:

Արմեն Մանվելյանը վստահեցրեց՝ չի կարող Հայաստանի տարածքով միջազգային որևէ ճանապարհ անցնել, որը չվերահսկվի Հայաստանի կողմից, դա կնշանակի հարված մեր ինքնիշխանությանը, մեր հեղինակությանը և տարածաշրջանում մեր կարևորությանը.

«Երկրի ինքնիշխանությունը ստորադասելու, երկրի ինքնիշխանությունը կորցնելու ճանապարհ է սա, մեր նշանակությունը տարածաշրջանում հիմա առանց այն էլ բարձր չի, էլ ավելի կիջնի:Հայաստանում տրանսպորտային միջոցներ են անցնելու , որը չի վերահսկվելու մեր կողմից, մենք չգիտենք՝ ի՞նչ են փոխադրելու դրանով՝ զենք-զինամթերք են տեղափոխում ապագա պատերազմի համար, թե այլ բան»,-ասաց զրուցակիցը և ընդգծեց, որ սա չի բխում հայկական կողմի շահերից, հետևաբար ցանկացած բացատրություն, ցանկացած խոսք ընդամենը փորձ է՝հասարակությանը մոլորեցնելու համար և թույլ չտալ հասարակությանը հասկանալ, որ երկիրը վաղուց կորցրել է ինքնիշխանությունը, իսկ ճանապարհի տրամադրումն ընդամենը ինքնիշխանության կորստի վերջին հարվածներն է լինելու:

Վերջինս նկատեց, որ որևէ էական տարբերություն չկա ճանապարհ և միջանցք տերմինների մեջ, նրա խոսքով, սրանք ընդամենը բերվել են օրակարգ, որպեսզի մարդկանց շեղեն իրականությունից.

«Հասարակությանը կասեն, տեսեք, ադրբեջանցիները միջանցք էին ուզում, մենք ճանապարհ տվեցինք, սա կեղծ թեզ է»,-ասաց Մանվելյանը:

Փորձագետը վստահեցեց, որ ճանապարհի կամ միջանցքի գոյությունը բացասական ազդեցություն կունենա սահմանային իրավիճակի վրա.

«Ադրբեջանցիները շարունակելու են նույն կերպ իրենց պահել, ինչպես հիմա, հայկական կողմը վախենում է քայլեր ձեռնարկել և իր բնակչությանը պաշտպանել: Այն ժամանակ թեզ էր պտտվում՝ եթե Նիկոլն ընտրելով ադրբեջանցիները մեր սահմանից հետ կգնան, հիմա էլ թեզ են պտտում՝ եթե միջանցք տանք կամ ճանապարհ, ադրբեջանական բանակը հետ կգնա: Չի գնա ադրբեջանական բանակը հետ, ընդհակառակը, նրանք առաջ են շարժվելու և մի շարք ուղղություններով խախտելու են մեր սահմանը, որովհետև մենք ենք թույլ տվել»,-եզրափակեց զրուցակիցը:

Աղբյուր` Փաստինֆո