Փաստ ինֆո

Ստացված 861 հաղորդումից 358-ը վերաբերում են նախընտրական քարոզչության շրջանում, իսկ 503-ը՝ քվեարկության օրն արված ընտրական խախտումերին։ ՍԴ-ում այս մասին ասաց Դատախազության ներկայացուցիչ Կարեն Բիշարյանը։

Նրա խոսքով ստացված հաղորդումներից 490-ով հանձնարարվել է ստուգողական գործողություններ կատարել, 371-ով՝ նախապատրաստվել են նյութեր, որոնցից 60-ով տարբեր հոդվածներով հարուցվել են քրեական գործեր։

Կարեն Բիշարյանը նշեց, որ հարոցված քրեական գործերից 26-ն ընտրակաշառք տալու/ստանալուն է վերաբերում, 8-ը՝ նախընտրական պաստառների ոչնչացմանը, 4-ը՝ նախընտրական քարոզարշավին մասնակցելուն կամ չմասնակցելուն հարկադրելուն, 4-ը՝ ընտրական հանձնաժողովների աշխատանքներին կամ ընտրությանը մասնակցող անձանց լիազորությունների իրականացմանը խոչընդոտելուն, 4-ը՝ քվեարկության գաղտնիությունը խախտելուն, 3-ը՝ մեկից ավել անգամ կամ այլ անձի փոխարեն քվեարկելուն, 2-ը՝ տեղամասային կենտրոնում կամ հարակից տարածքում բռնություն գործադրելուն կամ դրա սպառնալիքին։

«Նշված քրեական գործերով քրեական հետապնդում է հարուցվել 66 անձի նկատմամբ։ Որպես մեղադրյալ ներգրավված 16 անձի նկատմամբ որպես խափանման միջոց է ընտրվել կալանավորումը։ Այս գործերով քրեական հետապնդման ենթարկված 7 անձ հանդիսացել է ԱԺ արտահերթ ընտրություններին մասնակցած քաղաքական ուժերի պատգամավորի թեկնածու, որոնցից 4-ը՝ «Պատիվ ունեմ» դաշինքի, 1-ը՝ «Հայաստան» դաշինքի, 1-ը՝ ԲՀԿ-ի և 1-ը՝ «Վերելք» կուսակցության։ Նրանց նկատմամբ որպես խափանման միջոց է ընտրվել կալանավորումը»,-նշեց Դատախազության ներկայացուցիչը։

Աղբյուր` Փաստինֆո