Փաստ ինֆո

Դուք դատավորի պատմուճանը նախկինում կրած անձ եք և դրա ծանրությունը շատ լավ հասկանում եք: Այս մասին ՍԴ-ում նիստի ընթացքում ասել է ՍԴ դատավոր Երվանդ Խունդկարյանը՝ դիմելով ԿԸՀ նախագահ Տիգրան Մուկուչյանին, որն ընտրություններն անվավեր ճանաչելու դիմումների գործով ներգրավված է որպես պատասխանող կողմ:

Նշենք, որ Տիգրան Մուկուչյանը 2008-2010թթ եղել է Վարչական դատարանի նախագահը, իսկ 2011թ նշանակվել է Վարչական վերաքննիչ դատարանի նախագահ և պաշտոնավարել ընդամենը մի քանի ամիս՝ մինչև ԿԸՀ նախագահի պաշտոնը ստանձնելը:

ՍԴ դատավոր Երվանդ Խունդկարյանը, դիմելով Մուկուչյանին, նշեց, որ վերջինս նախկինում կրել է դատավորի պատմուճանը, ուստի շատ լավ է հասկանում դրա ծանրությունը, ապա Մուկուչյանից հետաքրքրվեց՝ ինչու է վերջինս խոսել գործի հետ յապ չունեցող դատական ակտերի մասին:

«Դուք շատ ճիշտ արտահայտվեցիք՝ նշելով, որ կխուսափեք որևէ գնահատական տալ դատարանի կողմից կայացված դատական ակտին: Շատ խրախուսելի է՝ պետական մարմնի ներկայացուցչի նման վարքագիծը՝ օրինական ուժի մեջ մտած դատական ակտին որևէ կերպ հանրության առջև գնահատականի արժանացնելու տեսանկյունից, բայց այդուհանդերձ միևնույն ժամանակ անդրադարձ կատարեցիք և մտահոգություն հայտնեցիք, որ Վարչական դատարանի կողմից կայացվել են երկու դատականբ ակտեր, որոնք Ձեր կարծիքով հակասում են:

Խոսքը վերաբերում էր այնպիսի դատական ակտերի, որը մեր դիմումի քննության շրջանակների հետ ընդհանրապես կապ չուներ»,- նշեց Խունդկարյանը՝ հավելելով, որ գործի քննության հետ կապ ունեցող դատական ակտերի մասին որևէ բան չի ասվել, փոխարենը՝ Մուկուչյանբը խոսել է բոլորովին այլ դատական ակտերի մասին:

Արձագանքելով բարձրաձայնված հարցին՝ Մուկուչյանը նշեց, որ որևէ գնահատական չի տվել ակտերին, պարզապես ցանկացել է փաստել այն հանգամանքը, որ ակտերին տրված իրավական դիրքորոշումները նպաստում են հետագա պրակտիկայի զարգացմանը:

Ինչպես արդեն տեղեկացրել ենք՝ արդեն չորրորդ օրն է, ինչ ՍԴ-ում քննարկվում է արտահերթ խորհրդարանական ընտրությունների արդյունքներն անվավեր ճանաչելու մասին քաղաքական ուժերի կողմից ներկայացված դիմումները՝ մեկ վարույթով։ ՍԴ-ի կողմից արդեն իսկ սահմանվել է դիմումների ներկայացման հաջորդականությունը, համաձայն որի՝ առաջինը բացատրությամբ հանդես կգան դիմումատուները, հետևյալ հաջորդականությամբ՝ «Հայաստան» «Զարթոնք», «Հայոց Հայրենիք», «Պատիվ ունեմ» դաշինքը, ապա՝ պատասխանող կողմը՝ ԿԸՀ-ն, հարակից պատասխանողները և երրորդ անձը՝ Քաղաքացիական պայմանագիր կուսակցությունները։

Հեղինակ՝ Իզաբել Սահակյան

Աղբյուր` Փաստինֆո