Փաստ ինֆո

ՀՀ արդարադատության նախարարի պաշտոնակատար Ռուստամ Բադասյանը ՍԴ-ում մեջբերեց ԵԱՀԿ/ԺՀՄԻԳ-ի ներկայացրած նախնական եզրակացությունից որոշ հատվածներ անդրադառնալով Դավիթ Հարությունյանի ելույթում առկա թեզերին։

«Մասնակիցները կարողացել են ազատ քարոզչություն իրականացնել։ Հիմնարար իրավունքները և ազատությունները հիմնականում հարգվել են, և մրցակիցներն ունեցել են ազատ քարոզարշավ իրականացնելու հնարավորություն»,-մեջբերեց Ռուստամ Բադասյանը, այնուհետև դիմելով Դավիթ Հարությունյանին հարցրեց համաձա՞յն է այդ գնահատականների հետ, ինչի ի պատասխան Դավիթ Հարությունյանն ասաց ոչ։

Ռուստամ Բադասյանը նկատեց «Պատիվ ունեմ» դաշինքի դիմումում նույն նախնական եզրակացությունների վրա հղում է արված, հետևաբար ինչպե՞ս է ստացվում, որ նախնական եզրակացության մի հատվածը նրանց համար ընդունելի է, իսկ մյուս հատվածը ոչ։

Դավիթ Հարությունյանը նշեց, որ այդ երկու հատվածները բացարձակապես տարբեր են.
«Հղում է կատարված փաստերին, որոնք արձանագրված են, իսկ դուք բերեցիք գնահատողական դատողություններ, որն ընդամենը այդ առաքելության կարծիքն է։ Մենք մեջբերել ենք միմիայն փաստագրական մասը»,-ասաց Դավիթ Հարությունյանը։

Ռուստամ Բադասյանը Դավիթ Հարությունյանին խնդրեց մեկնաբանել հայհոյանքների օգտագործումը նախընտրական քարոզարշավի ժամանակ։
Դավիթ Հարությունյանն ասաց, որ այն բառապաշարը, որն օգտագործվել է այս ողջ ժամանակահատվածում անթույլատրելի է։
«Առաջինը իշխանությունը պետք է քայլեր ձեռնարկեր, որ նման իրավիճակ Հայաստանում չլինի, բայց երբ իշխանությունն ինքն է նախաձեռնում, բնականաբար նման բաներ չի էլ կարող կանխել»,-ասաց նա։

Աղբյուր` Փաստինֆո