Փաստ ինֆո

ԲԴԽ նախագահ (լիազորությունները կասեցված են) Ռուբեն Վարդազարյանին որպես մեղադրյալ ներգրավելու մասին որոշումը պետք է վերացվի: Դատական ակտի կատարումը ենթադրում է մեղադրանքից հրաժարումը: Այս մասին «Փաստինֆո»-ի հետ զրույցում ասաց Ռուբեն Վարդազարյանի փաստաբան Հովհաննես Խուդոյանը: 

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Դավիթ Հարությունյանի նախագահությամբ, բավարարել է Ռուբեն Վարդազարյանին որպես մեղադրյալ ներգրավելու մասին որոշման դեմ Վարդազարյանի բողոքը՝ պարտավորեցնելով վերացնել Ռուբեն Վարդազարյանի իրավունքների և օրինական շահերի խախտումը։ Այլ խոսքով՝ դատարանն արձանագրել է, որ վարույթ իրականացնող մարմինը պարտավոր էր հաղթահարել Ռուբեն Վարդազարյանի գործառութային անձեռնմխելիությունը, ինչը չի կատարվել։

Թեև Դատախազությունից հայտնել են, որ դատարանի որոշման դեմ պատրաստվում են վերաքննիչ բողոք ներկայացնել, այդուհանդերձ, Ռուբեն Վարդազարյանի փաստաբան Հովհաննես Խուդոյանը «Փաստինֆո»-ի հետ զրույցում վստահեցրեց, որ դատական ակտն արդեն մտել է օրինական ուժի մեջ:

Մասնավորապես, ՀՀ քրեական դաըավարության օրենսգրքի 427-րդ հոդվածով նախատեսված է, որ գործն ըստ էության լուծող դատական ակտերն ուժի մեջ են մտնում բողոքարկման ժամկետն անցնելուց հետո, եթե այն բողոքարկված չի լինում, իսկ գործն ըստ էության չլուծող դատական ակտն ուժի մեջ է մտնում կայացման պահից: Փաստաբանը պարզաբանեց, որ դա հնարավոր է բողոքարկել, բայց բողոքարկումը չի կասեցնում ակտի կատարումը, իսկ եթե բողոքարկման արդյունքում կստացվի այլ արդյունք, ապա կրկին նույն իրավական կարգավիճակին վերադառնալու գործիքներ կան: Այսինքն՝ եթե այս պահին մեղադրանքի մասին ենք խոսում, մեադրանքը վերացվում է, եթե բեկանվում է դրա հիմք հանդիսացող դատական ակտը, նորից որոշումը վերականգնվում է, այսինքն՝ անձն ունենում է մեղադրյալի կարգավիճակ:

Դիտարկմանը, որ, եթե դատական ակտն արդեն ստացել է օրինական ուժ, ապա ստացվու՞մ է Ռուբեն Վարդազարյանի նկատմամբ հետապնդում իրականացվել չի կարող, նա այս պահին մեղադրյալի կարգավիճակ չունի, Խուդոյանն արձագանքեց՝ նշելով, որ Ռուբեն Վարդազարյանն այս պահին մեղադրյալի կարգավիճակ չունի և օրինական ուժի մեջ մտած դատական ակտի համաձայն՝ մեղադրանքն առաջադրելու պահից, քրեական գործ հարուցելու պահից ապօրինի քրեական հետապնդում է իրականացվել և այս պահին շարունակվում է, որովհետև դատական ակտը չի կատարվում:

«Շարունակվում է ապօրինի քրեական հետապնդում, ինչն իր հերթին իրավախախտում է: Բացի դա՝ չի կատարվում դատական ակտը, որն առանձին՝ Քրեական օրենսգրքով նախատեսված իրավախախտում է »,- նշեց Խուդոյանը:

Ինչ վերաբերում է քրեական գործի հնարավոր կարճմանը, փաստաբանը նշեց, որ, եթե դիտարկենք միայն մեղադրանքի որոշման մասով, ապա այնենթադրում է, որ մեղադրանքի որոշում պետք է չլինի, այսինքն՝ մեղադրյալի կարգավիճակ պետք է չունենա, դատական ակտն ինքնին գործը կարճելուն չի անդրադառնում, բայց, քանի որ գործ հարուցելու մասին որոշումը ևս նույն պայմաններում է կայացվել, որի վերաբերյալ կա առանձին վարույթ՝ նույն իրավական հիմնավորումներով, այդ որոշման արդյունքում էլ կնշանակի, որ գործն ընդհանրապես չէր կարող հարուցվել և այդ պայմաններում գործը պետք է կարճվի, քանի որ այնպիսի սխալ են թույլ տվել, որը շտկել հնարավոր չէ: Մասնավորապես, այլ հանգամանքներում, եթե բողոքարկվեր որոշումն այն հիմնավորմամբ, որ որոշումը պատճառաբանված չէ, ուստի՝ իրավունքի խախտում է, ապա քննիչը կարող է որոշումը վերացնել, նույն որոշումը կայացնել՝ պատճառաբանված՝ վերացնելով իրավունքի խախտումը, մինչդեռ, այս պարագայում անձեռնմխելիությունը չի հաղթահարվել, ինչ էլ արվի վարույթով, միևնույնն է, ԲԴԽ համաձայնությունը չկա և ցանկացած գործընթաց, ցանկացած ձեռք բերված ապացույց դառնում է ապօրինի, ուստի՝ քրեական գործը հետագայում պետք է կարճվի: Խուդոյանի դիտարկմամբ՝ այս պահին առաջնային խնդիր է դատական ակտի կատարումը, որը ենթադրում է մեղադրանքից հրաժարումը, իսկ ԲԴԽ-ն պետք է ի գիտություն ընդունի, որ այս պահին օրինական մեղադրանք չկա:

Հարցին՝ արդյոք առաջիկայում Ռուբեն Վարդազարյանը պետք է վերականգնվի պաշտոնում, Խուդոյանը պատասխանեց՝. «Իմ մեկնաբանությունն այդպիսին է, ես երկրորդ մեկնաբանություն չեմ տեսնում»:

Իսկ թե ինչու իրավապահները չեն դիմել ԲԴԽ-ին՝ փաստաբանը կարծում է, որ վստահ չեն եղել, որ ԲԴԽ-ից թույլտվություն ստանալու են, դրա համար էլ չեն դիմել:

Ինչպես արդեն տեղեկացրել ենք՝ ՀՀ ԲԴԽ նախագահ Ռուբեն Վարդազարյանին ՀՔԾ-ում մեղադրանք է առաջադրվել՝ ՀՀ քրեական օրենսգրքի 332-րդ հոդվածի 3-րդ մասի՝ պաշտոնեական դիրքն օգտագործելով արդարադատության իրականացմանը խոչընդոտելու հատկանիշներով, նրա նկատմամբ որպես խափանման միջոց է կիրառվել ստորագրությունը՝ չհեռանալու մասին։ Վարդազարյանի դեմ քրեական գործ է հարուցվել՝ առանց նրա անձեռնմխելիության հաղթահարման՝ նախկին դատավոր, ԱԱԾ տնօրենի նորանշանակ տեղակալ Անդրանիկ Սիմոնյանի հաղորդման հիման վրա։

Նկատենք, որ թեև ՀՀ գլխավոր դատախազությունը հայտարարել էր, թե Ռուբեն Վարդազարյանի գործառութային անձեռնմխելիության հաղթահարման խնդիր չկար, քանի որ քրեական հետապնդումը չի վերաբերում դատավորի կողմից իր լիազորությունների իրականացմանը։

Անգամ նախկին զինդատախազ Գագիկ Ջհանգիրյանի հանձնարարությամբ պատրաստված ԲԴԽ հաղորդագրության մեջ նշվել էր, թե Ռուբեն Վարդազարյանի նկատմամբ քրեական հետապնդումն իրականացվում է ոչ իր լիազորությունների իրականացման կապակցությամբ, սակայն փաստն այն է, որ քրեական գործը հարուցվել է պաշտոնեական դիրքի օգտագործմամբ արդարադատության իրականացմանը խոչընդոտելու հատկանիշներով։

Ռուբեն Վարդազարյանի նկատմամբ քրեական հետապնդում իրականացնելու որոշման դեմ երկու բողոք է ներկայացվել, որոնցից մեկով վիճարկվում էր քրեական գործի հարուցումը, մյուս բողոքով՝ Վարդազարյանին որպես մեղադրյալ ներգրավելու մասին որոշումը։ Երկու բողոքներով էլ բարձրացվել է գործառութային անձեռնմխելիության հաղթահարման անհրաժեշտությունը։ Փաստաբանի դիտարկմամբ՝ Ռուբեն Վարդազարյանի նկատմամբ ապօրինի հետապնդում է իրականացվել, վարույթն անթույլատրելի էր ի սկզբանե, ինչը հաստատվել է նաեւ դատարանի որոշմամբ։

Հեղինակ՝ Իզաբել Սահակյան

Աղբյուր` Փաստինֆո