Փաստ ինֆո

Վերաքննիչ քրեական դատարանը մերժեց Արմեն Չարչյանի պաշտպանների կողմից ներկայացված բողոքը։ Այս մասին Վերաքննիչ քրեական դատարանի բակում լրագրողների հետ զրույցում նշեց փաստաբան Արամ Վարդևանյանը։ Դատարանը հրապարակեց «Իզմիրյան» ԲԿ տնօրեն, «Հայաստան» դաշինքի պատգամավորի թեկնածու Արմեն Չարչյանի կալանավորման դեմ պաշտպանների բողոքի վերաբերյալ որոշումը։

«Դատարանը՝ Լուսինե Աբգարյանի նախագահությամբ  մերժեց մեր բողոքը, մերժեց բավականին դողդողացող ձանով, ամեն ինչ էլ ընկալելի է, հասկանալի է, բայց իրավաչափ չէ։ Ամեն ինչ հասկանալի է՝ Ճնշումներ դատավավորների նկատմամբ, նոր որակի մոտեցումներ, բայց այդ ամենը կապ չունի իրավունքի հետ»։

Վարդևանյանը նշեց, որ բոլոր դեպքերում Վերաքննիչ դատարան էին եկել արդարադատության ակնկալիքով, կարծելով, որ իրավաբանություն են տեսնելու, սակայն՝ ըստ իրենց՝ ապարդյուն։

«Դատարանի կողմից բոլոր հարցադրումները, որոնք հնչում էին, տպավորություն էին թողնում, որ կալանավորումը որպես խափանման միջոց պետք է վերացվեր։ Հերթական անգամ ունեցանք քաղաքական հետապնդման ագրեսիվ դրսևորման դեպքում պլանավորման ֆետիշացում»։

Վարդևանյանը նշեց՝ ինչքան էլ շարունակվեն ապօրինությունները՝ Արմեն Չարչյանը լինելու է ազատության մեջ։

Հիշեցնենք, որ տելեգրամյան մի ալիքում հրապարակվել էր ձայնագրություն, համաձայն որի՝ «Իզմիրլյան» բժշկական կենտրոնի տնօրեն Արմեն Չարչյանը հունիսի 18-ի առավոտյան աշխատակիցների հետ հանդիպմանը հորդորել է, որ աշխատակիցները պարտադիր կարգով մասնակցեն ընտրություններին։ Չարչյանը նշել է, որ եթե որևէ մեկը չմասնակցի ընտրություններին, ապա կիմանա այդ մասին։

Ձայնագրության հրապարակումից հետո հաշված ժամերի ընթացքում ՀՔԾ-ում հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով, որի շրջանակներում նախ բերման են ենթարկել Չարչյանին և տեղափոխել ՀՔԾ, ապա ձերբակալելու որոշում կայացրել։ Պաշտպանները բողոք են ներկայացրել Չարչյանին ձերբակալելու մասին որոշման դեմ, ինչը բավարարվել է քվեարկության օրը և նա դատարանի որոշմամբ ազատ է արձակվել։

Հունիսի 21-ին դատախազությունը հաղորդագրություն տարածեց՝ նշելով, որ ԿԸՀ-ն բավարարել է Արմեն Չարչյանի նկատմամբ հետապնդում իրականացնելու և նրան ազատությունից զրկելու համաձայնություն տալու վերաբերյալ միջնորդությունները։ ԿԸՀ համաձայնությունը ստանալուց հետո ՀՔԾ-ն մեղադրանք է առաջադրել Արմեն Չարչյանին՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան։

Աղբյուր` Փաստինֆո