Փաստ ինֆո

Սա ձեռագիր է, որը վկայում է նոր շինծու քրեական գործերի մասին, որոնք միտված են բացառապես Սյունիքի թուլացմանը։ Սյունիքի հանձնման մեկնարկն արդեն տրված է, որովհետև Սյունիքի համայնքապետերը միակն են եղել, որոնք չեն ենթարկվել Նիկոլ Փաշինյանի քմահաճույքներին, փորձել են տեր կանգնել ստրատեգիապես կարևոր նշանակություն ունեցող Սյունիքի մարզին, որովհետև սահմաններն օր օրի վտանգավոր են դառնում։ Այդ պարզ պատճառով էլ քաղաքական հետապնդումները և «վենդետտան» հիմա իրականացվում է Սյունիքի համայնքապետերի նկատմամբ։ Այս մասին «Փաստինֆո»-ի հետ զրույցում ասաց իրավաբան Ռոբերտ Հայրապետյանը։ 

Ինչպես արդեն տեղեկացրել ենք՝ Սյունիքի մարզի համայնքապետերի նկատմամբ նոր հետապնդումներ են իրականացվում։ Նրանց մեկուսացնելու ուղղությամբ աշխատանքներ իշխանությունները սկսել են խորհրդարանական արտահերթ ընտրություններից անմիջապես հետո՝ ի կատարումն Նիկոլ Փաշինյանի նախընտրական խոստումի առ այն, որ պատժելու է իրեն ընդդիմացող համայնքապետերին։ Երեկ ՀՔԾ էր բերման ենթարկվել Գորիսի համայնքապետ Առուշ Առուշանյանին, սակայն վերջինս հրաժարվել է ցուցմունք տալուց և ազատ է արձակվել, իսկ այսօր արդեն խուզարկություններ են իրականացվել Քաջարանի համայնքապետ Մանվել Փարամազյանի բնակարանում, ինչից հետո նրան ԱԱԾ աշխատակիցները բերման են ենթարկել։ Խուզարկություններ են իրականացվել նաև Զանգեզուրի պղնձամոլիբդենային կոմբինատում, ինչից հետո աշխատակիցներից մեկը կրկին բերման է ենթարկվել՝ Ռոբերտ Հայրապետյանի պնդմամբ՝ անհասկանալի պատճառաբանությամբ։

Ռոբերտ Հայրապետյանը մեզ հետ զրույցում նշեց, որ խուզարկություններն իրականացվել են դատարանների որոշման հիման վրա, իսկ թե ինչն է հիմք հանդիսացել դատարանի համապատասխան սանկցիայի տրման համար՝ այս պահին անհայտ է, մինչև Փարամազյանը կհասնի Երևան՝ ԱԱԾ, ինչից հետո պաշտպանի հետ կփորձեն հասկանալ, թե ինչ է կատարվում, ինչ քրեական գործի շրջանակներում է կատարվել խուզարկությունը, ինչ նպատակով է իրականացվել։

«Քաղաքական հետապնդումն ակնհայտ է, բայց քաղաքական հետապնդումն ինչ «իրավական շղարշի» տակ էին փորձում քողարկել»,- նշեց Հայրապետյանը՝ հավելելով, որ հայտնի չէ, թե խուզարկությամբ իրավապահներն ինչ էին փնտրում, ինչ նպատակով էին փնտրում.

«Տպավորություն է, որ փնտրում էին՝ այնքան որ ինչ-որ բան գտնեն, որ հնարավորություն ունենան Փարամազյանին կալանավորելու»։
Հարցին՝ արդյոք փորձ է արվում որոշակի ժամանակահատվածում առնվազն մեկուսացնել, Հայրապետյանը դրական արձագանքեց՝ հիշեցնելով, որ ռազմական դրության ապօրինի կերպով երկարաձգման ընթացքում իշխանությունները փոփոխություններ կատարեցին նաև Տեղական ինքնակառավարման մասին ՀՀ օրենքում, որտեղ մի կետ է սահմանվել, համաձայն որի՝ պաշտոնը ժամանակավորապես թափուր մնալու կամ լիազորությունների կատարման անհնարինության դեպքում վարչապետը կամ մարզպետը լիազորություն ունի նշանակել համայնքապետի ժամանակավոր պաշտոնակատար։

«Ես չեմ բացառում, որ այս գործողությունները միտված են նրան, որ անձանց՝ Փարամազյանին, Առուշանյանին, ուղղակի մեկուսացնեն իրենց պաշտոններից, այդ պաշտոններում նշանակեն Նիկոլ Փաշինյանի կամակատարի կամ «Քաղաքացիական պայմանագիր» կուսակցության համար ցանկալի դեմքերի, որ կարողանան օր առաջ ավարտին հասցնել Մեղրիի միջանցքի տրամադրման, Սյունիքից մի շարք այլ հատվածների տրամադրման գործընթացը։ Այլ նպատակ ես այս փուլում չեմ տեսնում »,- ընդգծեց Հայրապետյանը։

Ինչ վերաբերում է Առուշանյանին՝ երեկ բերման ենթարկելուն, Հայրապետյանը հիշեցրեց, որ Առուշ Առուշանյանն ունի պատգամավորի թեկնածուի կարգավիճակ, հետևաբար, համաձայն Ընտրական օրենսգրքի՝ առանց ԿԸՀ համաձայնության նրա նկատմամբ քրեական հետապնդում հարուցել այս փուլում չեն կարող և, քանի որ ԿԸՀ-ն նման որոշում չունի, Առուշանյանին բաց են թողել՝ մինչև համապատասխան գործընթացների իրականացումը։

Հեղինակ՝ Իզաբել Սահակյան

Աղբյուր` Փաստինֆո