Փաստ ինֆո

Գորիս համայնքի Քարահունջ բնակավայրի վարչական ղեկավար Լուսինե Ավետյանը ձերբակալվելուց հետո շուրջ 16 ժամ զրկված է եղել պաշտպանության իրավունքի իրացումից։ Ավետյանը ձերբակալվել էր երեկ՝ ժամը 16։24-ի սահմաններում, սակայն պաշտպան ներգրավվում է միայն այսօր։ 

Ինչպես արդեն տեղեկացրել ենք՝ Գորիս համայնքի Քարահունջ բնակավայրի վարչական ղեկավար Լուսինե Ավետյանը ձերբակալվել է երեկ՝ ընտրակաշառք տալու կասկածանքով։

Փաստաբան Րաֆֆի Ասլանյանը «Փաստինֆո»-ի հետ զրույցում հայտնեց, որ իր բացակայությամբ Ավետյանի մասնակցությամբ որևէ գործողություն չի իրականացվել։

«Հենց ձերբակալման արձանագրության մեջ ինքը նշել է, որ ցանկանում է փաստաբան ունենալ և ցուցմունք կտա միայն իր փաստաբանի ներկայությամբ և, բնականաբար, չի ընդունել վերագրված գործողություններին իր առնչությունը։ Այդուհանդերձ, առ այս պահը, նա փաստաբանով ապահովված չի եղել։ Ներկայումս սպասում ենք, շուտով ներգրավման գործընթաց կիրականացվի՝ Երևանի ՁՊՎ համապատասխան վայրում»,- նշեց Ասլանյանը։

Փաստաբանի փոխանցմամբ՝ ձերբակալման իրավաչափությունն արդեն վիճարկվել է՝ հաշվի առնելով այն հանգամանքը, որ անձի պաշտպանության իրավունքը խախտվել է քրեական գործով, նա պաշտպանության իրավունքից զրկված է եղել տևական ժամանակ՝ շուրջ 16 ժամ և պաշտպանական կողմը, ունենալով վստահորդի բանավոր և նրա հարազատների համաձայնությունը, արդեն բողոք է ներկայացրել, որն արդեն մակագրվել է, բայց քննության ժամի վերաբերյալ դեռևս տեղեկություն չկա։

Ըստ նրա՝ ձերբակալման թե հիմքն է ապօրինի, թե նպատակն է անօրինական, ինչի հաշվառմամբ էլ ներկայացվել է բողոքը։ Բացի դա՝ դատարան ներկայացված բողոքով վիճարկվել է նաև կասկածանքի էությունը։

«Նույնիսկ կասկածանքը չունի հստակ նկարագրություն, հատկանիշների նկարագրություն առհասարակ չկա, վերացական ձևակերպումներ են»,- ընդգծեց Ասլանյանը։

Հիշեցնենք, որ Գորիս համայնքի Քարահունջ բնակավայրի վարչական ղեկավար Լուսինե Ավետյանը ձերբակալվել է հուլիսի 5-ին՝ ժամը 16։24-ի սահմաններում՝ ՀՀ քրեական օրենսգրքի 149-րդ հոդվածի 2-րդ մասի 2-րդ և 4-րդ կետերով, 149.1-րդ հոդվածի 2-րդ մասի 2-րդ կետով, 154.2-րդ հոդվածի 2-րդ մասով և 154.2-րդ հոդվածի 3-րդ մասով նախատեսված արարք կատարելու հատկանիշներով։ Ըստ ՀՔԾ-ի՝ Լուսինե Ավետյանը, օգտագործելով Քարահունջ բնակավայրի չորս բնակիչներին 2021 թվականի մայիս ամսվա ընթացքում բանկային փոխանցման միջոցով «Դրամական աջակցություն» անվան տակ 100.000-220.000 ՀՀ դրամ տրամադրելու հանգամանքը, նրանց հարկադրել է մասնակցել ՀՀ ԱԺ արտահերթ ընտրությունների կապակցությամբ 2021 թվականի հունիսի 8-ին Գորիս քաղաքում «Հայաստան» դաշինքի կողմից կազմակերպվելիք քարոզարշավին, ինչպես նաև խոչընդոտել է վերջիններիս ընտրական իրավունքի ազատ իրականացմանը` հարկադրելով մասնակցել ընտրություններին և կողմ քվեարկել հիշյալ դաշինքի օգտին: Բացի դա՝ ըստ ՀՔԾ-ի՝ Ավետյանը, սոցիալական և առողջական խնդիրների կապակցությամբ ֆինանսական աջակցություն տրամադրելու եղանակով մայիսի 6-ին Քարահունջ բնակավայրի մեկ այլ բնակչի բանկային եղանակով փոխանցել է 100.000 ՀՀ դրամ, ապա` ԱԺ արտահերթ ընտրությունների նշանակման օրվանից հետո, տրամադրված գումարը հիշյալ ընտրողին և նրա ամուսնուն ներկայացրել է որպես ընտրակաշառք՝ հարկադրելով մասնակցել ԱԺ արտահերթ ընտրությունների կապակցությամբ «Հայաստան» դաշինքի կողմից 2021թ. հունիսի 7-ին Գորիս քաղաքում կազմակերպվելիք քարոզարշավին, ինչպես նաև հարկադրելով մասնակցել նշված ընտրություններին և կողմ քվեարկել «Հայաստան» դաշինքի օգտին։

Հեղինակ՝ Իզաբել Սահակյան

Աղբյուր` Փաստինֆո