Փաստ ինֆո

Շիրակի մարզի Բենիամին համայնքում բնակիչներն այլևս ոռոգման ջուր ստանալու հույս չունեն, նրանք ցանկանում են փոխհատուցում ստանալ իրենց վնասված դաշտերի համար։

«Փաստինֆո»-ի հետ զրույցի ժամանակ Բենիամին համայնքի ղեկավար Արտակ Անտոնյանն ասաց, որ երկու օր Մանթաշի ջրամբարից են ջուր ստացել, ինչը բավարար չէ գյուղի բոլոր դաշտերը ոռոգելու համար։

«Մի երկու օր տանջվեցինք մի քիչ ջուր հասավ, հիմա էլի չկա ջուր։ Դաշտեր կան, որ եթե անգամ ջուր էլ լինի, ջրելն արդեն անիմաստ է։ Դաշտերը պետք է ժամանակին ջրեինք։ Բույսը եթե այդ րոպեին ջուր ուզեց, պետք է ջրել։ Եթե նույնիսկ 5 օր էլ ուշանա, արդեն իմաստ չի ունենա»,- ասաց համայնքապետը։

Նրա խոսքով այն դաշտերը, որտեղ ժամանակին հասցրել են ջրել, վնասը քիչ է, բայց դաշտերի մեծ մասն ընդհանրապես չեն ջրվել այն դեպքում, երբ դաշտերը 3-4 օրը մեկ ոռոգման կարիք ունեն, մասնավորապես կարտոֆիլի դաշտերը։

Հարցին՝ որքա՞ն վնաս է հասցվել գյուղացիներին, Արտակ Անտոնյանն ասաց. «Եթե կարտոֆիլ ես ցանում, նվազագույնը 2-3 մլն ծախս է կատարվում։ Եթե բերք չլինի, պետք է մտածենք, որ գյուղացին ամբողջությամբ տուժվել է»։

Համայնքապետի խոսքով գյուղացիներին փոխհատուցում տրամադրելու հարցով նրանց հետ որևէ մեկը դեռ կապ չի հաստատել։

Անդրադառնալով ՀՀ էկոնոմիկայի նախարարի պաշտոնակատար Վահան Քերոբյանի այն հայտարարությանը, որ ֆերմերները երբեմն սխալ տեղեկատվություն են փոխանցում ջրային կոմիտեին, և մի բույսի փոխարեն ցանում են այլ բույս, որի ջրի պահանջարկն այլ է, Արտակ Անտոնյանը նշեց, որ նման խնդրի ծանոթ չէ։

«Երբ փետրվարին մեր գյուղ էին եկել պայմանագիր կնքելու, մարդիկ ասել են, որ օրինակ մեկ հեկտար կարտոֆիլ պետք է ջրեն, կարող է սերմ է մնացել և դարձել է 1.5 հեկտար, բայց դրա համար գումար պետք է վճարի, եթե ոռոգում լինի։ Կարող է մարդը փետրվարին պլանավորել է, որ պետք է կաղամբի շիթիլ տնկի, բայց հետո շիթիլ չի կարողացել ճարել, կարտոֆիլ է տնկել։ Նման բան հնարավոր է, բայց դա ջրի շատ ու քիչ լինելու հետ կապ չունի»,-ասաց Արտակ Անտոնյանը։

Վերջինս ընդգծեց՝ ամբողջ խնդիրն այն է, որ ամեն տարի Կառնուտի ջրամբարում նվազագույնը 18 մլն ջուր է լինում և այդպես են մեկնարկում ոռոգումը, իսկ այս տարի 9-10 մլն է եղել։

Հիշեցնենք, որ արդեն տևական ժամանակ է, ինչ Շիրակի մարզի մի քանի գյուղերի բնակիչներ պարբերաբար փակում են Գյումրի-Երևան ճանապարհը և բողոքի ակցիա իրականացնում ոռոգման ջրի խնդրի հետ կապված։ Այս համայնքները սնուցվում են Կառնուտի ջրամբարից, սակայն ինչպես նշում են բնակիչները և համայնքապետերը, այս տարի ջրամբարն ուշ են լցրել, ինչի հետևանքով բավարար քանակությամբ ջուր չկա և այսօր նրանք իրենց դաշտերը ոռոգելու ջուր չունեն։

Աղբյուր` Փաստինֆո