Փաստ ինֆո

Բաքվում գտնվող բոլոր ռազմագերիները վերադառնալու են՝ ժամկետի հարց է և տեխնիկական խոչընդոտների,- «Փաստինֆո»-ի հետ զրույցում վստահեցրել է գերիների վերադարձի հարցով զբաղվող Բորիս Ավագյանը։

Նրա կարծիքով՝ ՀՀ ԶՈՒ ԳՇ-ն և ԱԱԾ-ի ղեկավարությունը սերտորեն սկսել են համագործակցել ՌԴ-ի գործընկերների և ռուսական խաղաղապահ զորքերի հրամանատարի հետ, ինչը, ըստ նրա, կարագացնի գերիներին վերադարձնելու գործընթացը։

«Եթե մինչ այս գործընթացը բարդ էր գնում և փոքր խմբեր էին գալիս, ապա հիմա գործընթացը ակտիվացել է և հույս ունենանք, որ մոտակա ժամանակ բոլորը կվերադառնան տուն»,- ասել է նա։

Վերջին խումբը՝ 15 հոգի հայրենադարձվել է հուլիսի 3-ին, իսկ հայկական կողմը Ադրբեջանին է փոխանցել Ֆիզուլիի ու Զանգելանի շրջանների ականապատ դաշտերի քարտեզները: Առաջին նման փոխանակումը տեղի ունեցավ հունիսի 12-ին, երբ 15 գերիների վերադարձի համար հայկական կողմը Ադրբեջանին էր տրամադրել Ակնայի ականապատ տարածքների քարտեզները։ Նախընտրական փուլում 15 գերիների տուն վերադարձան ԱՄՆ և Վրաստանի ջանքերով, ինչի ժամանակ Ավագյանը հայտնեց, որ այդ քարտեզների դիմաց հնարավոր էր բոլոր գերիներին վերադարձնել։ Սակայն այս անգամ եւս տրամադրվեցին նոր քարտեզներ՝ կրկին վերադարձան միայն 15 հոգին, թեեւ բանակցություններն իրականացվել էին Ռուստամ Մուրադովի միջնորդությամբ։ Ինչու չհաջողվեց բոլորին վերադարձնել երկու տարածքների քարտեզների դիմաց «Փաստինֆո»-ի դիտարկմանն ի պատասխան Բ. Ավագյանը նշեց, որ բանակցությունները ընթանում են ու դրանց նախապայմանները փոխել անհնար է։

«Իրավաբանության մեջ գոյություն ունի прецедентное право հասկացություն։ Դուք ստեղծում եք նախադեպ։ Առաջին անգամ, որ 15 հոգու դիմաց տվել ես քարտեզ, դու չես կարող բանակցությունների ժամանակ այդ մեթոդաբանությունը փոխել, ասել չէ՝ բոլորին։ Արդեն այդ քայլով, երբ ԱՄՆ-ի միջոցով փոխանցեցին քարտեզը և ստացան 15 հոգի, ստեղծվել է նախադեպ։ Դրա համար բոլոր նախորդ բանակցությունները և նրանց հնարավոր ավելի դրական լուծումները արդեն չեն աշխատում, որովհետև երբ գնում ես բանակցելու՝ ասում են այն անգամ այդպես է եղել, արդեն նախադեպ կա»։

Ավագյանը դրական ու ողջունելի է համարում, որ գերեվարված անձանց վերադարձի պրոցեսն արագացել է, վերադառնում են ավելի մեծ խմբերով, քան նախկինում։ Իսկ ՀՀ ԶՈՒ ԳՇ-ԱԱԾ-Մուրադով համատեղ աշխատանքները շուտափույթ արդյունք կտան։

Արդոք հայորդիների նոր խումբը հայրենիք կվերադառնա այն ժամանակ, երբ Բաքվում կավարտվի դատավարությունը, Ավագյանը նշեց, որ դա իրենից ոչինչ չի ներկայացնում։ Ադրբեջանը շինծու դատավարությունով փորձում է միջազգային հանրությանը ցույց տալ, որ օրենքի երկիր է։

Դիտարկմանը, որ պատժի կրման ժամկետը հայտարարելու հաջորդ օրը 15 հայորդի վերադարձավ Հայաստան, Ավագյանը կրկնեց՝ դա ոչինչ չի նշանակում։

«Ինձ համար ադրբեջանական դատարանի դատավճիռը զուգարանի թղթից ավելի էժան բան է։ Չեմ կարող մեկնաբանել մի հանրապետության դատավճիռ, որը կեղծ բեմադրություններ է անում՝ խաբեբայությամբ։ Կեղծ դատավճիռը զուգարանի թուղթ է»

Աղբյուր` Փաստինֆո